Kum 54 miin Ruiz hmachhawn a duh

British legend Lennox Lewis meuh hneha khawvel lo barakhaih tawhtu Oliver McCall chuan IBF, WBA leh WBO heavyweight title kawltu Andy Ruiz Jr hmachhawn a duh thu a sawi a, "Ka fapa phuba lak ka duh a ni," a ti!

Kum 25 liam taa Lennox Lewis lo hneh tawhtu McCall hi kum 54 mi ni tawh mah se boxing khawvel a la chhuahsan lo a, a fight hnuhnung berah nikum November khan kum 27 mi Larry Knight a la hneh thei. McCall-a fapa Elijah chu kum 2012 khan Ruiz hian a hneh a, hemi hnuah hian fight pahnih chiah hmachhawn lehin boxing khawvel a chawlhsan zui. 

WBC heavyweight title kawl tura round hnihna leka Lennox lo hneh tawhtu chuan, "Ruiz-a'n ka fapa a hneh khan ring chhungah ka zuang lut nghal a, a mitah tak enin, 'Keimah hi min hmachhawn ta che,' ka ti a ni. Mahse, engmah a thleng zui lo. 

"Kan ti hlawhtling thei a nih chuan comeback chanchin ngaihnawm tak a ni ang a, boxing-a a fapa tana phuba la chunga heavyweight champion hmasa ber ka ni bawk ang. Mipuiin chu chu an hmuh chak ka ring," a ti. McCall hian 1985 khan a professional career a ṭan a, 1994-ah Lewis hnehin a champion. Mahse, 1997-ah hmachhawn lehin a tlawm a, a chawl zui. 

Kum kua hnuah a lo kir leh a, Brian Yates hneh nghalin a hawikir tawh lo. Vawi 74 fight a hmachhawnah vawi 58 a chak a, vawi 14 a tlawm a, vawi hnih chu 'no contest'-ah chhiar a ni - November 2020 thleng tal boxing-a cham a tum bawk.