Milan chungah Inter an leng

Antonio Conte-a enkawl Inter Milan chuan AC Milan 2-0 in an hneh a, star striker Romelu Lukaku chuan Milan derby a khelh hmasak berah goal a khung - Marcelo Brozovic-a'n goal khat dang a nei bawk.

Inrinni zan khan Serie A champion Juventus tan midfielder Aaron Ramsey-a'n a vawi khat nan inkhel bul a ṭan zanah goal a khung a, forward Cristiano Ronaldo goal nen an mikhual Hellas Verona 2-1 in an hneh.

Milan club pahnih hian khelmual atan San Siro an inṭawm a, tun ṭuma an match-ah hian Milan chu mual neitu niin fans tan ticket pawh a chang hnem zawk. Mual chhungah erawh Inter an chungnung a, a tir aṭanga a tawp thlengin inkhel an thunun.

Marcelo Brozovic-a'n minute 49-naah goal hmahruai khungin Manchester United striker hlui Lukaku-a'n a league match li khelh aṭanga a goal thum nan Nicolo Barella cross a tauh lut. Conte naute an khel ṭha a, Milan tan keeper Gianluigi Donnarumma chu player langsar a ni thung. Inter hian goal hnih an khung bakah Matteo Politano leh Antonio Candreva te chuan woodwork an tihper.

Inter Milan manager thar Antonio Conte chuan hnehna an chan hnuah chak phu zawk an nih thu a sawi. Conte chuan, "Champions League-ah duhthusamin kan khel lo a, chumi hnuah chiah inkhel boruak sang kan tawng zui.

"Ka beisei leh duh ang takin ka nauten an khel thei, derby hi chu a boruak a danglam a, hetiang hunah tak fans tana hnehna kan chang thei hi ka lawm," a ti. Inter hi tun season Serie A match li khelh tawha chak vek thei awm chhun niin hmahruaitu an ni mek.

AC Milan manager Marco Giampaolo chuan, "Kan chhe zawk tihna a ni lo, inkhel result danglamna chhan chu keini aia tawnhriat an ngah zawk vang chauh a ni. Goal kan chhuah hnua kan khelh danah beiseina kan nei tlem tih a hriat," a ti.

Maurizio Sarri hnuaiah Juventus-in hnehna chang mah se nuamsa takin point thum an hmu bik lo. An mual Allianz Stadium-ah goal an chhuah hmasa, mikhual Hellas Verona tan Miguel Veloso chuan minute 20-naah goal hmahruai a khung.

Turin club tan Ramsey-a'n a vawi khat nan inkhel bul a ṭan a, Wales midfielder hian hliam a neih vangin season tir lamah a hmel hmuh tur a awm lo - Champions League an khelh ṭumin bench aṭanga dah luh a ni tawh. Ani hian chawlhlawk hma deuhin hla deuh tak aṭangin si phurh a sut.

Italian champion tan second half tir lamah Ronaldo-a'n penalty aṭangin an goal hnihna a khung a, team pahnihin hun ṭha insiam zui nual mah se goal dang a lut tawh lo. Juve tan veteran goalkeeper Gianluigi Buffon chuan si ban a nghak a, kum 41 mi hian hun tawp dawnah save ṭha tak tak neiin a club hi point thum a hlawhchhuahpui. Hun tawp dawn chiaha Verona defender Marash Kumbulla hnawhchhuah chuan inkhelah nghawng a nei thui tawh lo.

Juventus manager Sarri chuan, "Ka naute kha an chau deuh a ni, inkhel hautak tak mai Atletico Madrid nen kan nei zo chiah a, league khelh zui leh hi chu a awlsam lo a ni. Team ṭha tak lakah point thum kan hlawh chhuak a, player zawng zawngin fak an phu," tiin a sawi.