Man City-in Watford an nghaisa

Manchester City-in Premier League champion nawn an tum tih nemngheh nan Norwich City an hneh loh hnua an league match hmasa berah Watford 8-0 in an sawp. Pep Guardiola hote hi Premier League-a goal chhuah loa goal riat khung thei hmasa ber an ni a, kum 1880-a din Man City-in top division-a an khingpui an sawp chian ber ṭum a ni.

Inrinni zana Etihad Stadium-a inkhelah hian City hian minute khatna aṭanga goal khung ṭanin minute 18 a nih chuan goal nga an khung tawh - David Silva-a'n bul ṭanin Bernardo Silva-a'n hattrick a siam a; Sergio Aguero, Riyad Mahrez, Nicolas Otamendi leh Kevin de Bruyne ten goal khat ṭheuh an khung. Hriat tel atana ṭha chu Citizen hian an player pawimawh Raheem Sterling, Gabriel Jesus leh Ilkay Gundogan te an chhawr  lo a, midfielder Fernandinho pawh tlarhnungah an chhawr.

Man City hliam vangin an buai a, Aymeric Laporte inhliam hnuah John Stones inti na ve lehin Otamendi chiah tawnhriat nei ṭha tlarhnung laiah a awm. Pep-a hote hi league-ah Norwich hneh zo lo an ni bawk a, Champions League-ah Shakhtar Donetsk hneh mah se Watford laka chesual thei tura ngaih an ni.

Hornets-in an manager hlui Quique Sanchez Flores la thar lehin Arsenal nen an inhnehtawk nghal a, Gunners nen hian point thum an hlawh chhuah loh avangin an vanduai anga ngaih an ni zawk. Amaherawhchu inkhelh hmaa ngaihdan leh inkhelh hnua thil thlen dan erawh thil dang daih a ni a, Watford leh City te huang khata awm siin an inthlau tak zet.

Man City midfielder Kevin De Bruyne chuan a thiam thil a pholang a, David Silva goal khung tur minute khatna leka a siamsak hnuah khelmual mawitu niin a game ṭha tak hi goal hmangin a khar. Premier League hi pa te tan a harsa tih an sawi ṭhin a, Pep-a awm hnuah erawh David Silva leh Bernardo Silva te chu khelmualah palian an ni tawh. Portuguese midfielder Bernardo Silva hian a khat mawi tawkin goal a khung a, City tana a hattrick hmasa ber a ni.

Pep-a hoten goal riat an khung chungin goal hmaah an vanduai tel a, penalty aṭanga goal khungtu Sergio Aguero vanneih ṭum ni se Watford-in an hming kimin goal an chhuah ang. City tan hian Leicester City champion puitu Mahrez pawhin goal ṭha a khung a, defender Otamendi-a'n goal venhim duh tawk loin goal a khung ve bawk.

Spanish manager Pep-a'n tlarhnungah Kyle Walker, Otamendi, Fernandinho leh Benjamin Mendy te bul a ṭantir a, Brazilian midfielder chiah hi defender pangngai ni lo mah se amah chiah hi khel tluan awmchhun a ni.

Pep hian Argentine defender Otamendi hi academy rawlthar Eric Garcia (kum 18) hmangin a thlak a, Walker pawh pound maktaduai 60 man Portugal right-back Joao Cancelo-a'n rawn thlakin Mendy aiah club academy chhuak Angelino hmuh a ni bawk. Hun tawp minute 30 chhung vel chu defender set thar hmuh an ni a, tlarhnung inhliam vangin Man City an buai lo.

September 20, Zirtawpni

Southampton    1-  3    AFC Bournemouth

SOU : James Ward-Prowse 53' (P)

BOU :  Nathan Ake 10'; Harry Wilson 35';

Callum Wilson 90+5'

September 21, Inrinni

Leicester City    2 - 1    Tottenham Hotspur

LEI : Ricardo Pereira 69'; James Maddison 85'

TOT : Harry Kane 29'

Burnley    2 - 0    Norwich City

BUR : Chris Wood 10', 14'

Everton    0 - 2    Sheffield United

SHE : Yerry Mina 40' (OG); Lys Mousset 79'

Newcastle United    0 - 0    Brighton & Hove

Premier League-a insawpna nasa zual

March 1995    Man Utd 9-0 Ipswich

November 2009    Tottenham 9-1 Wigan

September 2019    Man City 8-0 Watford

September 1999    Newcastle 8-0 Sheffield Wednesday

May 2010    Chelsea 8-0 Wigan

December 2012    Chelsea 8-0 Aston Villa

October 2014    Southampton 8-0 Sunderland