Santosh Trophy Qualifying Round Mizoramin chakin bul an ṭan
Santosh Trophy Qualifying Round North East Zone chu nimin aṭang khan Umakanta Mini Stadium, Agartala-ah khelh ṭan a ni a. Mizoramin an match hmasa berah Arunachal Pradesh 1-0 in an hneh a, group A inkhel dangah Tripura-in Assam 2-1 in an hneh ve bawk.
Final round-ah North East aṭangin team hnih an tling dawn a, group khatah team khat tan chauh hmunruak a awm. Vawiin hian group B an inlan dawn a, tlai dar 3:00-ah Manipur leh Nagaland an inkhel ang a, September 25-ah Meghalaya an inlan ve chauh ang.
Mizoram 'thar'
Mizoram tana qualifying round khel tur zingah 2014 Santosh Trophy champion team zinga mi pahnih chiah awm tawhin Lalbiakhlua chu captain a ni a, Lalrinzuala Khiangte chuan right back-ah bul a ṭan bawk. Tlarhnungah season liam taa Chhinga Veng leh Mizoram tana inkawp PC Laldinpuia leh Vanlalzuidika te defence laiah awmin vei lamah left wing back ṭhang duang chho mek Vanlalnghenga a awm. Goalkeeper-ah Mizoram Police keeper
F. Lamuanawma aiah Electric Veng keeper Lalmuansanga thlan a ni.
Midfield-ah tawnhriat nei ṭha R. Malsawmtluanga leh rawlthar Lalruatfela te an inkawp a, goal nawr turin Biaktea, Ramhlunchhunga, Vanlalthanga leh Jessy Vanlalmuana te awmin tawnhriat nei ṭha leh hmabak nei êng player an inchawhpawlh ṭha hle.
Mizoram chakna Jessy
Jessy Vanlalmuana'n MPL match hnuhnung berah Ramhlun North a chakpui a, goal a khung bakah man of the match-ah thlan a ni. Zobawk tlangval Jessy hi Santosh Trophy khel tura koh a ni a, tun season-a a bul ṭan ṭhat hi Mizoram tan pawh chhunzawmin Arunachal lamah goal awmchhun a khung.
Minute rukna lekah captain Biaktea cross chu Jessy hian a tauh goal a, Mizoramin point thum hlu tak an hlawhchhuah phah. Coach Lalremtluanga kaihhruai Mizoram hian inkhel an thunun a, goal chance an ngah hle. Amaherawhchu goal an khung miau loh avangin vanduai thei dinhmunah an ding a, keeper Muansanga'n ṭum hnih ṭha takin a dang.
Engtin zel?
Inkhelh hmain Mizoram manager K. Lalenghluna (Maenga) chuan, "Arunachal Pradesh hi tun hnaiah nasa takin hma an sawn a, chetsual theihna tur an ni. Anni hi kan hneh theih chuan hmabak a awlsam sawt ang," tiin Vanglaini a hrilh a, hnehna an chan takah chuan final round kawng a inhawng zau hle.
Inkhelh banah Maenga chuan, "Chance ṭhahnem tak kan neih avangin chak kan phu a, hei aia tama chak tur kan ni. Kan khelhna hmun pawn aṭangin ṭhat hmel deuhin lang mah se a rual rem lo a, ruah a sur bawk avangin a nal a, khelh a harsa deuh bawk," tiin a sawi.
Group A
Nimin Inkhel Results
Mizoram 1 - 0 Arunachal Pradesh
MIZ : Jessy Vanlalmuana 6'
Assam 1 - 2 Tripura
September 24, Thawhlehni
Arunachal Pradesh 9:30 AM Assam
Tripura 3:00 PM Mizoram
September 26, Ningani
Tripura 9:30 AM Arunachal Pradesh
Mizoram 3:00 PM Assam
Group B
Vawiin Inkhel Tur
Manipur 3:00 PM Nagaland
September 25, Nilaini
Nagaland 3:00 PM Meghalaya
Setpember 27, Zirtawpni
Manipur 3:00 PM Meghalaya