Champion inbeisei Tuikual South

Mizoram Super League Season 6 a hmuhnawm dawn, tualchhung team hlun leh ṭha ber pawl ni deuh reng thei Tuikual South chuan a vawi khat nan champion an tum dawn. TSBC hian February 15, Thawhlehni zanah team thar Chawnpui an hmachhawn ang.

Season hmasa khan Tuikual South hian final lut mah se Zarkawt BCA an ngam lo, kuminah India captain Amritpal Singh hoa inlan tur an nih avangin beiseina an nei sang pawh hi a mak lo - Khatla TBL leh BCA te elphak tura ngaih an ni.

Tuikual South coach C. Lalrohlua chuan an inpeih tawh thu sawiin, "Kan inbuatsaihna a rei tawh, club-in an training kan neih bakah player mahnia taksa sawizawi chhunzawm pawh an awm hial ṭhin," tiin MSL6 hmachhawn tura an phur tawh thu Vanglaini a hrilh.

"Phengphehlep ṭial mawite, Tuikual an hrut del del..." tih hla hmangin TSBC fans-in player an au phur a, kuminah pawh a ni leh ang. Rohlua chuan, "Season dang ang bawkin keini chuan fans kan ṭangkaipui leh ang," a ti.

Phengphehlep team-ah hian player senior leh junior an inpawlh mawi tawk hle. Captain F. Zodinthara kaihhruaina hnuaiah player thar C. Lalmalsawma leh Lalrinfela Pachuau ten an theihna tak lantir an tum ang. Anni pahnih hi coach Rohlua'n kan mamawh tak kan lalut a tihte kha an ni.

Tuikual South hian kuminah hlawhtlin ngei an duh, MSL lama tawnhriat nei Amritpal Singh an ziak lut. Zarkawt BCA tan pawha khel tawh Amritpal hi India captain ni lai a ni a, state pawn player lak dawn chuan ani aia duhthlan tur dang an tam bik lo ang.

TSBC manager Freddy Lalngaihawma chuan, "Amritpal Singh a rawn khel thei tur hi kan lawm, amaherawhchu a tir aṭangin kan chhawr thei rih dawn lo. Knockout stage chinah erawh chuan a inlan hman ang," tiin Vanglaini a hrilh.

MSL-ah India ram pawn aṭangin player pakhat lakluh theih a ni a, kuminah Tuikual hian American player Darrel Steven Bowie an nei dawn. Bowie hi tunah Mizoram a la rawn thleng lo a, ani hi chu league round aṭanga chhawr theih an beisei.