Nadal a inkhel thei lo

Rafael Nadal chuan a hnungzâng na vangin ATP Cup match hmasa ber a khel thei lo. Nimin khan inlan tur ni mah se chawpchilh takin a inhukdawk leh hnuhnawh a ni.

Rod Laver Arena-ah Spain leh Australia an intawng a, world number 2 Nadal hi Alex De Minaur nen singles match pahnihna khel tura tih an ni. Mahse a inlan theih loh tur thu hi twitter lamah a tarlang.

Grand Slam vawi 20 champion tawh Nadal chuan, "Ka hnungzâng hnuai lam a nuam lo a, kei leh Spain team chuan match hmasa ber hi khel lo turin thutlukna kan siam," tiin a sawi a, tournament tawp lam chu khelh theih a la inbeisei.

Australian Open inbuatsaih nana an hman ATP Cup-ah hian champion lai Serbia tan Novak Djokovic a inlan a, world number 1 hian a match hmasa berah Canadian tlangval Denis Shapovalov chu 7-5, 7-5 in a hneh nghal.

Ram leh ram tennis team inelnaah hian Group A-ah Serbia hian 2-1 in Canada hi an hneh. Djokovic chuan, "Inelna nuam leh hlimawm tak a ni, team hmanga inelna ni mah se a awlsam lo hle. Ram tan a nih tawh chuan chak duhna a sang zual ṭhin," a ti.

Group A-ah hian Germany pawh an awm. Alexander Zverev awmna ram hian vawiin an group match hmasa an khel ve ang.