Zanin dar 7-ah Churchill Vs Aizawl FC

I League hmahruaitu Churchill Brothers leh an hnuai chiaha awm Aizawl FC te zanin dar 7:00 hian Kalyani Stadium-ah an inhmachhawn dawn. Goan club hian point 11 hmuin Aizawl FC aiin point liin hmu tam mah se match khatin an khel tam a, Mizo club tan lehthalna hun ṭha a ni ang.

Churchill Brothers hi league hmahruaitu an nih avangin zanin inkhelah hian a buk rit zawk an ni a, tun season-ah chak loh an la nei lo. Goan club hian match nga an khelh tawh aṭangin goal kua an khung a, goal thum chauh an chhuah. 

Chutihrualin Churchill hian Indian Arrows lakah goal nga ngawt an khung tih hriat a ṭha a, Mohammedan leh Trau ten an chelh thei a, Mizo tlangval tan zamna tur a awm lo. Goan club aṭangin player kan thur chhuak dawn a nih chuan tlarhmaa inkawp Honduran forward Clayvin Zuniga leh Slovenian forward Luka Majcen te an ni ang.

Kum 29 mi Zuniga hian goal nga a khung tawh a, kum 31 mi Majcen hian goal thum a khung tawh bawk. Heng player pahnih thlawp tur hian I League-a Minerva Punjab champion pui tawhtu Bazie Armand an kawl a, champion tura rinkai ber an ni hial ang. Tlarhnung lamah Aizawl FC aṭanga inzir chhuak Vanlalduatsanga'n hmun pawimawh a chang bawk.

Aizawl FC-in foreigner pathum captain Alfred Jaryan, forward Princewill Emeka leh defender Richard Kasagga te an nei a, vanduai thlak takin Ugandan defender Kassaga hi khup hliam vangin a chawlh chen tur a hriat loh. 

Foreigner pahnih chiah chhawr tur an nei tawh a, Mizo tlangvalten mawhphurhna an lak a ṭul dawn. Neroca an hneh ṭumin tlarhnungah Samthang tlangval PC Laldinpuia leh Durtlang tlangval Lalchungnunga te an inkawp a, Manipur club lakah an rintlak hle.

Tlarhma lamah MC Malsawmzuala rinrawl a ni chho a, mual sir aṭangin Ramhlunchhunga leh Brandon VL Remdika ten an thlawp ṭha. Winger tlan chak Lalmuanzova la inhliam mah se goal nawr ti na thei tur H. Lalmuankima, Lalliansanga leh Lalremsanga Fanai te an awm.

Heng player-te chawm tur hian tawnhriat nei ṭha R. Malsawmtluanga a awm a, goal venhim an ngai pawimawh zawk a nih pawhin Alfred-a kawppui turin Lalengmawia a la awm cheu bawk. Aizawl FC-in squad ṭha tak an nei a tih theih.

Churchill enkawltu Argentina-a piang, Spanish manager Fernando Varela chuan, "Aizawl hian talent nei ṭha tak tak an kawl hnem avangin hneh an harsa dawn. Set piece-ah an ṭha a, kan fimkhur a ṭul dawn a ni. Bul ṭan chauh kan nih avangin hma hruai mah ila kan la champion lo a, nomawi kan chawi ngei theih nan min hnaih bertu hi kan hneh a ngai a ni," tiin a sawi.

Aizawl FC coach Yan Law chuan, "Churchill nena kan inkhel tur hi inkhel pawimawh a ni. I League team ṭha ber zinga mi an ni a, a harsa dawn. Goan club nena kan inkar tih zim kan tum dawn a, kan phur vanglai takin team ṭha tak hi kan hmachhawn dawn a ni," tiin chak a  inbeisei thu a sawi ve bawk.