Man City leh Liverpool inlan zan

Zanin hian Premier League champion tura rinkai pahnih Manchester City leh Liverpool te an inlan dawn. Zan dar 11:30-ah Manchester City-in Turf Moor-ah Burnley an hmachhawn ang a, dar 1:45-ah Liverpool leh Brighton & Hove Albion te Anfield-ah an inkhel ang.

Jurgen Klopp-a hote hi champion lai an ni a, inhliam vanga an talbuai chungin champion rinkai zingah an la tel pha. Pep Guardiola hote season hnuhnung pathuma vawi hnih champion thei an ni a, league hmahruaitu an ni bawk.

Manchester City-in season liam ta khan point 81 an hmu a, pahnihna ni mah se an chunga awm Liverpool-in point 99 an hmuh avangin an che ṭha lo tia sawi an ni. Amaherawhchu tun season-ah an elpui ber Reds an talbuai a, Pep-a hote hi hmahruaitu an nih bakah an khelh ṭhat bawk avangin 'City tak tak' kan hmu leh tawhah a ngaih theih.

Man City hi Tottenham Hotspur laka an tlawm hnuah an tlawm leh tawh lo a, league match 12 aṭangin vawi 10 an chak. Spurs an hneh loh zawha an hmachhawn chu zanina an khelhpui tur Burnley hi a ni a, 5-0 zetin an sawp.

Pep-a hoten an harhtharna inṭan nan Clarets hi an hmang a, zanin pawh hi a tawpna tur niin a lang lo. City hian an player pawimawh Kevin De Bruyne, Sergio Aguero leh Nathan Ake te la chhawr thei dawn lo mah se Burnley hneh turin an la ṭha tawk.

Man City-in Sheffield an hneh ṭumin tun hnaia che ṭha John Stones leh Joao Cancelo bakah defence thlawptu Rodri te an awltir a, anni pathum tel lo pawh hian goal an chhuah chuang lo. Blades an hneh ṭum hian Raheem Sterling leh Riyad Mahrez te awltir mah se Ferran Torres leh Gabriel Jesus te an lalut thei tho.

Tun hnaia City chet ṭhat nan midfielder ball thiam pahnih Ilkay Gundogan leh Bernardo Silva te an pawimawh a, Kevin De Bruyne awm loh pawh a lang lo tih hiala sawi theih a ni.

Pep-a hote tan erawh fimkhur a ṭul. Burnley hian an match hnuhnung berah Chelsea hneh lo mah se Liverpool, Fulham (FA Cup) leh Aston Villa te hneh theihtu an ni a, a awlsam lo ang.

Liverpool-in hmachhuan bik an nei lo tiin sawi ṭhin bawk mah se tlarhmaah chuan Mohamed Salah aia rintlak an nei lo. Egyptian forward hian goal hnih class tak hmangin West Ham 3-1 in a hnehpui a, league-ah goal 15 khungin top scorer a ni mek.

Tlarhnung khawng ṭha Brighton lakah Salah a pawimawh dawn. Seagulls hian league match hnunung pathumah goal an chhuah tawh lo a, Fulham leh Tottenham 1-0 ve vein an hneh.

Man City nena an inkhelh ṭum pawhin Brighton hi chak lo mah se goal khat chiah an chhuah a, Liverpool nen an intum hnuhnun ber ṭum pawhin 1-1 in an inhnehtawk. Jurgen Klopp-a'n point thum hmuh a duh a nih chuan rilru sen a ṭul ang.

German manager hian inhliam vangin Joel Matip, Fabinho, Sadio Mane, Virgil van Dijk, Naby Keita, Joe Gomez leh Diogo Jota te a la chhawr thei dawn lo. Tlarhnung a rem dan tur mawlh hi hriat châkawm chu a ni a, Fabinho a la awm loh avangin Jordan Henderson chu awm leh tura khan ber a ni. 

Hendo kawppui tur hian Nathaniel Phillips leh Rhys Williams te an awm leh mai a rinawm. Defender thar Ben Davies leh Ozan Kabak te erawh chhawr an nih hmain Klopp-a hnuaiah Reds khelh dan hmang an zir leh phawt a ṭul a rinawm.