A nau hmaah Mou a tlawm

Jose Mourinho chuan Chelsea-a a lo enkawl ṭhin Frank Lampard a ngam lo a, Tottenham Hotspur chuan a sang pali zinga telna remchang an neih bawhpelhin khualmualah Chelsea chu 2-1 in an hneh lo. 

Blues tan tawnhriat ngah Olivier Giroud chuan inkhel bul a ṭan a, inhliam damkawr Tammy Abraham chuan bench-ah hun a hmang - Arsenal striker hlui Giroud-a'n a hun ṭha neih a bawhpelh duh lo a, minute 15-na lekah goal hmahruai a khung. 

Second half ṭantir, minute thumna lekah Giroud bawk a inlar. January transfer-a chhuak tur anga sawi hman striker hian Mason Mount tan ball a pe a, Mount hian Ross Barkley-a pe zui.

Barkley-a'n a sira tlan Marcos Alonso tan a pe phei a, Spanish left back hian inngaihtuah buai loin goal-ah a lo pet nghal - Spurs keeper Hugo Lloris tan dan theih a ni lo. 

Spurs tan Erik Lamela-a shot chuan Antonio Rudiger perin goal-ah a lut a, minute 89-na a nih tawh avangin khel chhe tak Tottenham tan comeback-na hun a awm tawh lo - 2-1 in an tlawm a, hetichung hian Spurs hi an vannei!

Giovani lo Celso chu second half-a Chelsea captain Cesar Azpilicueta laka a chet dan avangin hnawhchhuah ngei tur a ni - mahse VAR chuan hnawhchhuah loh turin thutlukna a siam a, inkhelh zawh hnuah official-te chuan an tihsual a nih thu an sawi leh lawi si. 

Spurs coach Mourinho chuan, "Ka player-ten an theihna zawng zawng an hlan a, mahse striker kan nei tlat si lo a ni," a ti a, inhliam Son Heung-min leh Harry Kane tel loin an hriam tawk lo tih a pawm. 

Lo Celso red card hmuh loh vangin Lampard a lawm lo a, Blues manager chuan, "Ennawn turin minute tam an nei a, a dik loin thutlukna an siam. A hnua an tihsual thu sawi leh ringawt hi awmzia a awm lo," a ti a, chak mah se match official-te chungah a lungawi lo.