Maitland-Niles leh Willock intuaihriam dawn

Arsenal midfielder Ainsley Maitland-Niles chuan tun season tawp thleng cham turin West Brom chu loan hmangin a zawm. Premier League mawng lama talbuai club a zawm chhan hi inkhelh tam a duh vang a ni.

Thlasik bazar tawp ni thleng khan West Brom, Leicester leh Southampton te chuan Maitland-Niles hi an ngaihven. England international hian Foxes zawm duh mah se manager Mikel Arteta leh technical director Edu te thu angin Hawthorns a zawm ta zawk.

Kum 23 mi Maitland-Niles hi player beiseiawm tak zinga mi a ni a, tun hnaiah ram tana khel tur pawhin koh a ni. Mahse Arsenal tan khelhna hmun a chang mumal lo, kumin nipui laiin Euro a awm dawn avangin ram tana khel phak tur chuan club lamah khelh tam a ngai.

Newcastle chuan Maitland-Niles hi an lo ngaihven ve bawk. Mahse, Arsenal aṭangin Joe Willock chu loan hmangin an hawh tawh; Premier League danah club pakhat aṭangin player pakhat aia tam loan hmangin a hawh theih loh.

Tlak hlauhawma awm mek West Brom hian Turkey international midfielder Okay Yokuslu chu Spanish club Celta Vigo aṭangin loan hmangin an hawh bawk.