Liverpool-in Stamford Bridge an sawi nghing

Premier League-ah Liverpool chelh thei an la awm lo - match ruk an khelha an vawi ruk chakna ni turin Reds hian Pathianni zan khan Chelsea chu 2-1 in an hneh. 

Liverpool tana Trent Alexander-Arnold leh Roberto Firmino goal khung chu Chelsea-in N'Golo Kante hmangin an chhanglet a, si phurh sut zawhna tur erawh an nei lo. Reds-in season hmasa nena chhiar telin league match 15-ah a zawnin hnehna an chang ta a, Manchester City (18) record nih rual turin match thum chak an la mamawh. 

Stamford Bridge-a inkhelah Liverpool an zam lo a, goal pawh an khung hma - minute 14-na lekah Arnold chuan freekick aṭangin kawh zetin a khung a, training ground-a an zir dan tih a hriat. 

Blues tan captain Cesar Azpilicueta chuan si phurh a sut niin inhre mah se VAR a inrawlh a, ennawn a nih hnuah offside vangin he goal hi pawm a ni lo. Minute 30-naah Chelsea tawnhriat neih tlem a lang chhuak a, vengtu nei lo Roberto Firmino chuan corner aṭanga ball kal chu an goal hnihna ni turin a tauh lut. 

Liverpool-in first half chhung zawng inkhel an thunun a, Reds fan-ten chak loh hlauhthawnna rilru an pu lo.

Frank Lampard-a'n chawlhlawkah a naute thu a hrilh ṭha tih a hriat a, 2-0 a hnufual ni mah se Blues hian beiseina nen second half-ah Liverpool an nawr. 

Minute 71-naah Blues hian goal an hlawh chhuak ta nge nge a, Kante chuan mawi zetin goal kil chung sirah a thlawh lut - Chelsea an phur sawt. Liverpool fan-te thin thiin an ṭhu thei tawh lo, an sana an en a, hun tawp an nghakhlel - Napoli laka chak lo hlim hi an zin chauh avangin tha an nei tam lo tih a hriat a, an che hleithei tawh lo.  

Mahse, minute 90 chhung inkhel aṭanga lang chiang chu Chelsea hian team 'puitling' tak din tur chuan season khat tal insiamrem nan hun an la mamawh tih hi a ni a, Tammy Abraham leh Mason Mount-te hun ṭha hlah enin an la puitling tawk lo tih a lang. 

Match ruk chiah la khel mah se Liverpool leh Manchester City chu Premier League-a inum ber tur niin an lang leh der tawh a, City hian Inrinni zan khan 8-0 in Watford an nghaisa. 

Team pahnih khelh dan a in an bawk avangin Pep Guardiola leh Jurgen Klopp-ten khaikhin an hlawh a, "Tu tactic nge hmuhnawm zawk?" tih chu sawi 'hot' zingah a tel. Mahse, Klopp chuan, "Team nazawngin an khelh theih loh football kan khel a, hnehna chan tumin keimahni 'style' ngei kan hmang. Technical lam indona a ni lo a, a pawimawh ber chu point hlawhchhuah a ni," a ti. 

Reds hian match ruk an khelhah team ṭha Arsenal leh Chelsea an hneh ve ve tawh a, Nilaini zanah MK Dons chu League Cup-ah an hmachhawn zui ang.