Santosh Trophy Qualifying Round A thlengtu hmaah Mizoram fiahna

Mizoram chuan Santosh Trophy Qualifying Round 2019-20 a an match hmasa berah Arunachal Pradesh 1-0 in an hneh a, vawiin tlai dar 3:00 hian inelna thlengtu Tripura nen Umakanta Mini Stadium, Agartala-ah an inhmachhawn ang. Nimin tlai khan group B match hmasa ber khelh a ni a, Manipur leh Nagaland 0-0 in an inhnehtawk.

Group A-ah hian Mizoram elpha ber tura ngaih chu Assam ni mah se tun ṭumah hian team an tir ṭha tawk lo niin a lang a, Tripura an hneh lo. Assam ṭhat tawk loh chhan hi Bordoloi Trophy khelh mek a nih avangin club-in an player ṭha ṭhenkhat an chhuah lo. Chutihrualin mahni muala khel Tripura-in ṭantu an ngah a, Assam an hneh thei avangin Mizoram lakah pawh point hlawh an inbeisei ang.

Mizoram manager K. Lalenghluna (Maenga) chuan, "Mizoram team tan hian kohhran hrang hrangte leh mimal ṭawngṭaisakna kan dawng nasa a, minti phur hle. Team kan inlungrual a, thu kan awih em em a; kan professional tawh khawp mai. Inhliam kan nei lo a, Tripura hmachhawn turin kan inpeih," tiin Vanglaini a hrilh.

Match hmasa berah Mizoram hian Arunachal Pradesh lakah goal khat chauh an khung a; captain Lalbiakhlua, Vanlalthanga leh Ramhlunchhunga ten khelhna hmun an chang leh a nih chuan Tripura lakah chance hlah nawn a thiang tawh lo ang.

Arunachal Pradesh hneh ṭum hian tawnhriat nei ṭha MS Dawngliana leh Lalrammawia ten bul an ṭan lo a, Tripura nen a tir aṭanga an khelh pawhin an mal lo ang. Maenga chuan, "Arunachal Pradesh nena kan inkhel entu kha an tam a, Tripura nen chuan an tam lehzual ang. Agartala leh a chhehvela Mizoten min ṭawiawm ṭha a, kan lawm hle," tiin Mizo mipui zarah khualmualah mahni mual ang maia an khelh theih thu a sawi.