Fulham-ah striker thar

Premier League table mawng lama talbuai lai Fulham chuan goal khung kawnga an harsatna sutkian an tum. Ligue 1 club Bordeaux aṭangin striker Josh Maja chu tun season tawp thleng cham turin loan hmangin an hawh.

Cottagers hian an duh a nih chuan loan hun a zawh hunah Nigeria striker hi a nghetin an la thei dawn. London khawpuia piang Maja-a'n tun hmain kum bithliah inelna lamah Crystal Palace leh Fulham tan a khel tawh a, English football-ah a mikhual lo ang.

Fulham neitu zinga mi, director of football ni bawk Tony Khan chuan, "Kan club-a Josh kan nei let leh thei ta hi a lawmawm hle, kum 22 mi chauh a la ni a, heti chung hian khelmual chhungah a puitling tawh hle. Ani hian kawng tam takah min puih ngei ka beisei," tiin a sawi.

Season kal laiah Fulham hian league match 21 an khelh aṭangin goal 17 chauh an la khung a, team 20 inel zingah anni aia khung tlem chu Sheffield United (12 goals) leh Burnley (13) te chauh an ni.