China Open champion Marin

Hun rei tak chhung hliam vanga a chawlh hnuah Carolina Marin a rawn kir a, Spanish shuttler hian a dam tawhzia lantir nan China Open title a vaw chhuak leh ta.

Pathianni zan Changzhou-a khelh zawh China Open final-ah world champion ni lai Marin hian Tai Tzu Ying chu 14-21, 21-17, 21-18 in a hneh a, player pahnih an inkhel tawk hle - darkar khat leh minute nga chhung ngawt an inkhel.

Rio Olympic champion Marin chuan, "Hliam vanga ka inkhelh theih loh lai khan tun hun hi ka thleng leh thuai ang tih ka ngaihtuah phak lo, na nei chunga awm kha chu a hrehawm hle. Tunah chuan beiseina nen hmalam ka thlir ve leh thei tawh ang," a ti.

Kum 26 mi Marin hi January thla khan a inhliam a, a khup zai a nih hnuah a chawl rei hle. Season a hman mumal loh hnuah tun hnaiah a inkhel ve leh thei ṭan chauh a ni, a tan hlawhtlinna duhawm a ni ngei ang.