Inhliam vangin Deepak-a'n silver a la

World Wrestling Championships 2019 chu Pathianni khan Nur-Sultan, Kazakhstan-ah khelh zawh a ni a, gold medal beiseina Deepak Punia chu inhliam vanga final-ah a inhnuhdawh avangin India-in silver medal pakhat lain bronze medal pali an la tel bawk.

September 14 aṭanga ṭan inelnaah hian Deepak Punia hian 86 kg category-ah final an thleng a, tun ṭum inelnaa Indian zinga final thleng awmchhun a ni. Amaherawhchu Deepak hian Inrinnia a inbuan hmasak ber naah a nghalrek a tih nat avangin final-ah Iran wrestler Hassan Yazdani a hmachhawn thei ta lo.

Cadet world champion leh junior world champion ni tawh Deepak hian tun ṭuma medal a dawn phak avangin  2020 Olympic Games-ah a inlan thei ang. Deepak bakah hian bronze medal la pali Rahul Aware, Vinesh Phogat, Bajrang Punia leh Ravi Kumar te Toyko-a neih tur Olympic-ah hian an zin thei bawk ang.

World Wrestling Championships-ah hian Russia chuan gold medal pakua bakah silver leh bronze panga ve ve lain pakhatna an ni. India erawh gold an lak loh avangin medal panga lai la mah se 17-naah an awm pha chauh.