Thlasik transfer a tawp - season dang a phak lo

European top five league-ten thlasik transfer-a squad tihchhahna remchang an neih ṭhin hun chu February 1 zan khan a tawp ta a, Premier League-ah chuan nimin zing dar 4:30 khan a tawp - ṭum dang angin transfer bazar 'hot' tak a ni lo. 

Thlasik transfer tawp niah 'Big Six' huang chhung club aṭangin Liverpool chiahin player an lalut a, hei pawh 'big signing' an tih huang chhunga dah chi a ni lo - club langsar ho an che na thei lo. 

Liverpool hian centre back Ben Davies chu Championship club Preston North End aṭangin an lalut a, Schalke central defender Ozan Kabak chu loan-in an lalut bawk.

Japan forward Takumi Minamino chuan Anfield-ah beisei a phak lo hnuin Southampton chu season khat chhung atan loan-in a zawm bawk a, thil thleng langsar dang sawi tur erawh a tam lo hle. 

Kum 2012 khan thlasik transfer-ah Premier League club-ten pound maktaduai 60 an seng a, tun season-ah pound maktaduai 70 an seng. Kum 2012 hnua Premier League club-ten thlasik transfer-a sum an sen tlem ber ṭum a ni. 

Season hmasa thlasik transfer-ah khan Premier League club-ten pound maktaduai 230 ngawt an seng a, tun season-a an sen zat nen chuan khaikhin chi pawh a ni lo. 

Tun thlasik transfer-ah hian Premier League club transfer 24 chiah a thleng a, tun hnai season thum chhung January transfer-ah chawhrualin transfer 46 awm ziah ang a ni a, hei hi a phak lo hle. 

Premier League table mawng lama awm club paliin player pasarih la tharin pound maktaduai ruk chiah an seng a, season hmasa khan English top flight league table-a a hnuai lam pali ten Januady transfer-ah player pariat lalutin, pound maktaduai 40 chiah an seng!

Season dangah chuan nipui a ni emaw, thlasik a ni emaw, transfer bazar-ah chanchin ngaihnawm tak tak hriat tur a awm ṭhin a, a bik takin transfer tawp ni hian ngaihven a hlawh lehzual ṭhin. 

Tun season-ah erawh eng ruai kan hre lo - Reds-in Davies an lakluh leh Brighton & Hove Albion-in Ecuador midfielder fak rawn Moises Caicedo an lakluh te, Joshua King-a'n Bournemouth aṭanga Everton-a zawmte chu transfer tawp nia loan ni lo hmanga transfer awm an ni. 

Liverpool-in Davies bakah Kabak chu loan-in an lalut a, Minamino chuan Saints a zawm a, Newcastle-in Arsenal midfielder Joe Willock chu season tawp thleng atan loan-in an la a, Willock-a khelhpui Ainsley Maitland-Niles chuan loan-in West Brom a zawm a, Baggies hian midfielder Okay Yokuslu chu La Liga club Celta Vigo aṭangin an lalut bawk. 

Bordeaux striker Josh Maja chuan loan-in Fulham a zawm a, January transfer bikah chuan Manchester United-in Atalanta winger Amad Diallo (£19m), West Ham-in Brentford forward Said Benrahma (£20m) an lakluhte leh Aston Villa-in pound maktaduai 14-a Marseille midfielder Morgan Sanson an lak te chu a tel - Diallo man bik hi pound maktaduai 18.2 pek belh theih tura tih a ni. 

Deloitte-in an chhut dan chuan European club hausa zual 20-ten Covid-19 avanga sum an hloh tur zat chu pound tluklehdingawn 1.77 a tling a, transfer bazar-a insum ngawih ngawihna tham a ni.  

Dan Jones, Deloitte Sports Business Group-a partner chuan, "Covid-19 in sum leh pai lama nghawng a neih zel theih dan turte ngaihtuahin Premier League club-te hi an fimkhur takzet a ni," tiin a sawi. 

January 2021-a Premier League club-ten ram pawn club laka sum an sen zat chu pound maktaduai 45-a tling a, kumin hmaa thlasik transfer hnuhnung pahniha Premier League club-ten ram pawn club aṭanga player lakluh nana sum an sen zat chawhrual chu pound maktaduai 165-a ni. 

January 31, 2020 khan Brexit a thleng a, United Kingdom chu European Union aṭangin an inhnukdawk a, hei hian Premier League club tan ram pawn aṭanga player lakluh a ti harsa bawk - a chhan ber erawh Covid-19 a ni. 

Championship club Watford-in Bergkamp an lalut a, hei erawh Arsenal legend Dennis ni loin a fapa Mitchel Bergkamp a ni thung. Hornets hian Pochettino an lalut bawk a, hei pawh Mauricio ni loin Paris Saint-Germain coach fapa Maurizio Pochettino a ni. 

Kum 22 mi Bergkamp hian thla ruk atan Watford a zawm a, Pochettino hian kum 19 mi lek niin free transfer-in Championship club hi a zawm thung.  

Manchester City winger ṭhin Shaun Wright-Phillips-a fapa, Arsenal legend Ian Wright-a tupa ni bawk D'Margio Wright-Phillips chuan Manchester City aṭangin Stoke City a zawm dawn.

Hetihlai hian Manchester United legend Paul Ince-a fapa Tom Ince chuan Stoke hi chhuahsanin Championship club tho Luton Town chu loan-in a zawm bawk. 

European top five league dangah pawh Premier League ang thoin thawm a ring thei lo a, Juventus midfielder Sami Khedira chuan Bundesliga club Hertha Berlin chu a nghetin a zawm a, hei hi transfer langsar pawl a ni. 

Premier League-a beisei anga hlawhtling ta lo, Everton striker Cenk Tosun chuan Besiktas chu loan-in a zawm a, Galatasaray chuan Newcastle full back DeAndre Yedlin chu free transfer-in an lalut bawk. 

Hriat tel tur erawh club-te hian duh huna player lalut turin zalenna an la nei reng a, an player lakluhte erawh free agent an nih a ngai thung a, transfer window inhawn lai khan an club an chhuahsan hman ngei a ngai bawk. 

Transfer tawp hnuah loan hmangin player lakluh theih a ni tawh lo a, hetihrual hian hriatthiam bikna dan erawh a awm - club pakhata senior goalkeeper inhliam vek se, club chuan a thlaktu tur lalut turin zalenna a nei. 

Transfer tawp niah Reds-in Big Six (Arsenal, Manchester City, Manchester Utd, Liverpool, Tottenham & Chelsea) zingah thawm an nei na ber a, an player lakluhte erawh lawm avanga zuanpui tur em chu an ni lo. 

Turkey central defender Ozan Kabak chuan season tawp thleng atan loan-in Liverpool hi a zawm a, an duh chuan season tawpah pound maktaduai 18, a khelh ṭhat dan a zira pek belh turin an lalut thei ang - tunah chuan loan-a hawh man pound maktaduai khat an pe phawt ang a, a game khelh dan leh Champions League-a Liverpool thlen san dan a zirin £500,000 an pek belh bawk ang. 

Kum 25 mi Davies-a'n Reds a zawm a, Preston defender contract rei zawng hi 'hun rei tak chhung atan' tia ziak a ni a, a man zat hi pound maktaduai hnih chauh a nih avangin hliam vanga chawl mek Virgil van Dijk leh Joe Gomez-te nen khaikhin chi a ni lo - Tottenham laka 3-1 a an chak ṭuma inhliam Joel Matip chu season tawp thleng a inlan thei dawn lo bawk. 

Hetihlai hian Saints chuan Takumi Minamino chu season tawp thleng atan loan-in an lalut a, Championship club Bournemouth zawmtu Shane Long-a thlak ang. Kum 26 mi Japanese forward hian January 2020 khan pound maktaduai 7.25-in Red Bull Salzburg aṭangin Reds hi a zawm.