Formula 1-ah Vettel a chak ve leh ta

Ni 392 chhung zet chak ni hmel a hmuh loh hnuah Sebastian Vettel chuan Formula 1 inelnaah hnehna a chang ve leh ta a, German driver hnungah hian Ferrari-a a teammate Charles Leclerc a thleng.

Tun hnaiah Ferrari an rawn chet ṭhat avangin F1 rorel mektu Mercedes in vai vung lutuk tur an dal. Champion lai Lewis Hamilton chu palinaah thlengin Ferrari driver pahnih nen an inkarah hian Red Bull duhlai Max Verstappen a awm ve bawk a ni.

Pathianni zan khan season khat chhunga zana an tlan awmchhun Malaysian Grand Prix chu Marina Bay Street Circuit-ah tlan a ni a, world champion vawi li ni tawh Vettel hian darkar khat leh minute 58 bakah second 33.667 chhunga thlengin pakhatna dinhmun a luah.

German driver hi Red Bull aṭanga Ferrari-a a insawn hnuah beisei a phak lo, season hmasa leh kumin bikah pawh tihsual a ngah hle. Singapore-a inelna an neih hma hian a la beidawn loh thu a sawi a, tunah chuan huaisen taka ngamtu a ni leh ta.

Kum 32 mi Vettel chuan, "Team thawhrah a ni, season tir lamah hun harsa hmang mah ila tun hnaia kan thawh chhuah dan hi a lawmawm hle. Theihna sang tak a awm miau chuan thup reng theih a ni lo, a lan chhuah hun a awm ṭhin," a ti.

Belgium leh Italy-ah Leclerc-a'n hnehna a chang a, Singapore-ah pawh a hmasa ber aṭanga a tlan ṭan avangin a zawna a vawi thum nan hnehna a chan a rinawm hle. Ferrari driver senior zawk Vettel erawhin pathumna aṭangin bul a ṭan a, hnehna chang tur zawkah team thuneihna a pawimawh.

Pit Stop hman laiin Vettel-a'n a teammate, amah aia patuai zawk Leclerc hi a tlan pel. F1-ah chuan team lamin an driver tlan dan turah thuneihna an nei sang a, hun pawimawh leh inelna boruak sangah pawh intlan pelhtir chang an nei fo.

Kum 21 mi Charles Leclerc chuan, "Team lam aṭanga thupek a nih ka ring, kan ṭhat tlanna tur a nih chuan a lawmawm zawk. Mahse, a nihna takah chuan ka hrilhhai hle, team lam aṭanga thupek a nih chuan a tuar theih, driver thutlukna a nih erawh chuan a lawmawm loh," a ti.

Season tir lamah Mercedes driver pahnih Hamilton leh Valtteri Bottas ten pakhatna leh pahnihna dinhmun an inluah chhawk zak zak a, tunah pawh British driver hian a teammate lakah point 65 zeta sang zawkin a la chungnung.

Inelna hmachhawn hmabak paruk an la nei a, champion tur la chiang lo mah se Hamilton hian a nomawi kawl lai a humhim theih a rinawm. Mercedes driver inkarah Bottas tan Hamilton thik a thiang lo a, Ferrari erawh senior zawk Vettel a tlan ṭhat tawk loh avangin tawnhriat nei tlem Leclerc-a'n duhsakna dawn belh a beisei a nih pawhin a mak lo ang.