Professional boxing-ah Sangtea chak

Mega Boxing Event-ah Mizo tlangval Lalrinsanga Tlau chuan Pathianni khan a khingpui Digari Mahesh chu unanimous decision-in a hneh. Khawruhlian tlangval Sangtea hian professional fight hmasa berah hnehna a chang a, a inzirna Sete Boxing Academy tan hlawhtlinna a ni.

Delhi-a boxing inelna hi pawnah (outdoor) neih a ni a, ruahsur vangin Inrinniah neih theih a ni lo. Pathianni khan inelna hi neih a ni a, Digari hi Mizo tlangval a hmachhawn hma hian vawi hnih chak tawhin vawi khat a chak lo. Amaherawhchu Sangtea hi a vawi khat telna a nichungin Digari, Team Cultfit lakah round ruk an inhnekah a chungnung vek.

Khawruhlian tlangval hian round 2-ah Digari hi a hnek thlu a, referee-in vawi riat a chhiar hnuah a rawn tho chhuak. Sangtea hian a hnek thlukna lamah a kut a tih nat avangin 'combination punch' a hman nasat a ngaih phah a, chiang takin hnehna chang mah se a knockout thei ta lo.

Sangtea hi Sete Boxing Academy-a chief coach Sete-a leh coach Andrew ten an hruai. Sete-a chuan, "New Zealand lam aṭanga lo kal boxing hruaitu John Glozier chuan Sangtea hi a fak hle a, a khel hmuhnawm a tih bakah champion hial ni turah a ngai. Ani bakah hian a hmuna inhnek entute pawhin a khelh dan sawi zui nuam an ti hle," tiin Vanglaini a hrilh a, contract offer ṭha zawk an hmuh theih an beisei thu a sawi bawk.