Petersburg Open-ah Medvedev a champion

Tunlai mipa tennis player hmuhnawm berte zinga mi Daniil Medvedev chuan Borna Coric hnehin St. Petersburg Open nomawi a chawi a, season tawpa a thiam zual pariat ten an khelh tur ATP Finals atan a tling tawh bawk.

Pathianni zan inkhelah world number 4 hian Coric hi 6-3, 6-1 in a hneh a, tun hnaia match a khelh hnuhnung 27 aṭangin vawi 24 ngawt hnehna a chang thei a ni.

Petersburg-ah hian seeded pakhatna ni chungin a inlan, season kal laia ATP title pathumna la tur hian harsatna a tawk lo. Medvedev bakah Rafael Nadal, Novak Djokovic, Roger Federer leh Dominic Thiem te chiahin kuminah ATP hnuaia inelna ngaihhlutah nomawi pathum an chawi tling.

Kum 23 mi Medvedev chuan, "Tennis court chhungah chuan inkhelh lai chauh ngaihtuah turin rilru ka siam a, tuna hnaia ka khelh ṭhat theih chhan lian tak a ni pawhin ka hria. Midangte hlawhtlinna angin a lian tawk lo a ni mai thei, ka tan erawh eng inelna mai pawh hi a hlu em em rih vek a ni," a ti.

Thla hmasa khan Medvedev hian US Open a khel a, tournament tir lamah chuan mipui ṭan a hlawh lem lo. Final-a Rafael Nadal a hneh loh zawh meuh chuan fans lam rilru a hneh tawh hle - season tharah chuan a tir aṭangin ṭan a hlawh tawh ang.