Marquez tan champion nomawi a hnai

Bike khalh thiam hmingthang Marc Marquez chuan a ropuina ram a zauh zel. Spanish rider hian Pathianni zan khan Aragon Grand Prix-ah hnehna a chang a, a vawi ruk nana world champion ni turin hmabak a nei tlem ta hle.

October 6 hian Thailand Grand Prix tlan a ni leh dawn, tun dinhmuna point 98 zeta hmahruai faltu Marquez hian hnehna a chang a nih chuan world title a kawl lai a humhim thei der tawh dawn - Thailand bakah hian inelna dang pali ngawt hmabak an la nei!

Aragon Grand Prix an tlanna Ciudad del Motor de Aragon hi Marquez chenna Cervera aṭanga 160km chauha hlaa awm a ni. Tualchhung tlangval hian a hmasa ber (pole) aṭanga bul ṭanin, a tawp thlengin ro a rel tluan. Season kal laiah Marquez-a'n vawi riat ngawt hnehna a chang ta a, Aragon bikah hian season li zet chu a zawnin hnehna a chang tling ta chiah bawk. A hnungah hian 10-na aṭanga bul ṭantu Andrea Dovizioso thlengin, Ducati rider Jack Miller leh Yamaha bike khalhtu Maverick Vinales ten an zui bawk.

Honda rider Marquez chuan, "A tir aṭanga fal taka hmahruai chunga hnehna chan kha ka tum dan a ni a, ka hlawhtling. Awlsam taka chak anga min ngai a ni mai thei, ka hnunga awm Dovizioso kha beidawng ve ngai lo a nih avangin a awlsam lo," tiin a sawi.