Messi, Messi, Messi, Messi

Lionel Messi-a'n goal li a khung a, Barcelona-in Eibar 5-0 in an sawp. Inkhel dangah Real Madrid-in Levante 1-0 in an hneh lo a, La Liga-ah Catalan club-in hma an hruai leh ta.

Eibar chuan, "Nangmah vangin kan tuar a, i hnathawh rah kan tuar. Chelh che kan tum a, kan thei nghang lo. Ding chunga kut benga nangmah fak zawng hi kan tih theih chu a ni," tiin Messi fakna club official twitter-ah an ziak hial!

Lionel Messi-a'n match li chhung goal a khung tawh lo a, Barcelona-in result ṭha neih an harsat bawk avangin Argentine forward leh a club khelhnain sawisel an tawk. Quique Setien hnuaiah Barca-in goal khungtu an mamawh a, Leganes aṭangin Martin Braithwaite an lalut hial - an hlauthawng tih a hriat.

Barcelona-in chhan chhuaktu an mamawh a, an mi zawng chu hmun dang aṭanga rawn kal loin an kawl sa 'Lionel Messi' bawk a ni. Kum 32 mi Messi hian minute 14-na lekah Eibar defender pathum bum tlangin goal hmahruai a khung a, minute 37-naa a goal hnihnaah pawh player pathum tho bum lehin a pet goal - mi bik a nihzia a pholang.

Minute 40-naah Messi-a'n hattrick siam thei mah se Antoine Griezmann pek a thlang. Mahni hmasial lo Messi-a'n malsawmna a dawng a, Griezmann hi Eibar defender-in tihpersak hmanin Barcelona captain zawnah a kal let - Messi-a'n hattrick a siam. Second half-ah player thar Braithwaite dah lutin Barca player thar hian Messi goal khung tur minute 87-naah a siamsak.

Messi-a'n goal hmasa pali a khung hnuah Barca-in Messi inrawlh loin goal an khung. Minute 89-naah Braithwaite-a pet chu Eibar keeper-in dang mah se a per chu Arthur Melo-a'n a pet goal. Barca player thar Braithwaite chuan, "Messi ka kuah hnuah ka kawr ka su lo ang," tiin club captain a ngaihsan thu a sawi.

Martin Braithwaite chhuahsan Leganes-in player 10-a khel Celta Vigo 1-0 in an hneh lo a, Barcelona erawhin player thar an ṭangkaipui nghal. Quique Setien chuan, "Braithwaite kha kan beisei aiin a khel ṭha. Ka rilru tak takin player ṭha tak kan lalutin ka hria. Goal hnihah a inrawlh nghal a, player dang nen an inkawp rem thuai ang," tiin a sawi.

Barcelona player thar Braithwaite pawhin, "Leo ka siamsak thei kha ka lawm. Messi khan kan khelh dan min lawmpui a, khelmualah pawh ṭha taka ka khelh theih nan ball min pe tam bawk," tiin a chet 

ṭhatna kawngah Messi a ṭangkai thu a sawi.

Real Madrid-in Levante lakah inkhel thunun mah se goal an khung theih loh an tuar. Jose Luis Morales-a'n minute 79-naah goal ṭha bik a khung a, Levante-in 1-0 in Real Madrid an hneh.

Real inkhelah hian Gareth Bale leh Luka Jovic te damlohna vangin an khel thei lo a, Chelsea aṭanga manto taka an lakluh Eden Hazard-a'n chance ṭha bik a hlah. Spanish club tana beisei pha lo Hazard hi minute 67-naah hliam vangin lakchhuah a ni.

La Liga-a champion inchuh Real Madrid leh Barcelona te hi March 1, Pathianni zan hian Santiago Bernabeu-ah an inkhel dawn. El Clasico hma hian Champions League khelh tur a awm, Real Madrid-in Nilaini zanah Man City an mikhual dawn a, Thawhlehni zanah Barcelona-in Napoli an tlawh bawk ang.