Bundesliga nomawi inchuh boruak a sang Bayern, RB Leipzig leh Dortmund an chak vek

Bundesliga-ah champion lai Bayern Munich-in Zirtawpni zan khan table mawngphaha awm Paderborn chu an mual Allianz Arena-ah 3-2 in an hneh hram a, an elpui RB Leipzig-in Schalke 5-0 in an sawp avangin German champion beiseina an la chhi nung. Borussia Dortmund pawhin Werder Bremen mualah 2-0 in hnehna an chang a, Erling Braut-Haaland-a'n goal an khung zel.

Football-a thil thleng fo a ni a, season chawhnu lamah table mawng lama awm khelh an harsa fo. Bayern Munich-in tun season-a point 16 chauh la hmu Paderborn an mikhual a, tun hnaia an khingpui sawp ṭhintu Bavarians-in harsatna an tawk.

Minute lina lekah Manuel Neuer-a'n goal net aṭangin ball a chhar a, amaherawhchu Paderborn tana goal khungtu Streli Mamba a offside avangin pawm a ni lo. Bayern-in minute 25-naah Serge Gnabry hmangin an khung hmasa a, Germany international forward hi Paderborn tlarhnungin an veng uluk chungin goal a khung tho.

Mual sira Bayern keeper Manuel Neuer chetsual hmang ṭangkaiin Dennis Srbeny-a'n inringtawk takin goal lamah khalhin minute 44-naah siphurh a sut. Second half-ah team ṭha zawk Bayern bawkin goal an khung hmasa a, fing taka Gnabry-a pek let chu Robert Lewandowski-a'n 'cool' takin minute 70-naah a khung.

Kingsley Coman-a'n Bayern dinhmun siam ṭhatna hun ṭha a neih chu keeper Leopold Zingerle-a'n a tibuai hman a, Paderborn-in point hmuh beiseina an neih phah. Substitute Dennis Jastrzembski-a'n minute 75-naah kawh zetin a pet a, keeper Neuer-a'n dang mah se a per chu Sven Michel-a'n goal-ah a chantir.

Minute hnih chiah a awm tawh tihin player ṭha danglamna a lang a, mual vei lam aṭanga Gnabry-a cross ṭha zet chu Lewandowski-a'n a pet goal a, Polish striker-a'n Bayern a chhanhim.

RB Leipzig-in Schalke mualah bul an ṭan ṭha a, minute khatna lekah Marcel Sabitzer hmangin goal an khung nghal. Second half-ah Timo Werner, Marcel Halstenberg, Angelino leh Emil Forsberg ten goal khat ṭheuh an khung belh a, Leipzig hian 5-0 in hnehna an chang.

Leipzig tana thu lawmawm chu Werner-a'n thla khat chuang hnuah Bundesliga-ah goal a khung a, Manchester City aṭanga loan hmanga an hawh Angelino-a'n goal a khung bakah Christopher Nkunku-a'n assist vawi li ngawt a nei. Kum 22 mi Nkunku hian season ṭantirh khan PSG aṭangin Leipzig hi a zawm a, German club-ah hmun pawimawh a chang pha.

Dortmund coach Lucien Favre-a'n PSG an hneh ṭuma starting eleven a hmang nawn a, inkhelah erawh Werder Bremen-in bul an ṭan ṭha zawk. First half-ah goal a lut lo a, second half-ah Dortmund insiamṭhain Jadon Sancho corner pet chu Dan-Axel Zagadou-a'n minute 52-naah a pet goal.

Haaland-a goal khung tur keeper Jiri Pavlenka-a'n dang mah se Norwegian forward chelh reng theih a ni lo. Kum 19 mi Haaland hian minute 66-naah Sancho leh Achraf Hakimi te thawhrah sengin chak nemnghehna goal a khung.

Norwegian forward Haaland hian tun season goal 40 a khung tawh a, Dortmund tan match riat lekah goal 12 a khung tawh a ni.