Arsenal player 10 leh Chelsea inhnehtawk

Defender rinrawl David Luiz chu minute 26-naah hnawhchhuah a ni a, an mikhualna ramah ṭum hnih ngawt goal an phur - player pakhata tlem zawk Arsenal chuan huaisen takin Chelsea khelmualah point an sual chhuak; London club pahnih hi 2-2 in an inhnehtawk.

Thawhlehni zan Premier League inkhel hmuhnawm takah Frank Lampard-a enkawl Blues hian Jorginho leh Cesar Azpilicueta te goal hmangin vawi hnih hma an hruai. Mikel Arteta nau ten Gabriel Martinelli leh Hector Bellerin te goal hmangin an sut.

Stamford Bridge-ah David Luiz a kir a, tun hma lama ropui taka a khelh tawhna hmunah hian Arsenal jersey a ha tawh thung. Luiz hian tlarhnung lai a dinpui Shkodran Mustafi backpass sual siamṭha tura a tlan letna lamah Tammy Abraham a ti tlu - penalty a chawi a, red card pek a ni bawk.

Chelsea midfielder Jorginho-a'n harsa lo takin a khung a, Blues hi anmahni muala khel an nih avang leh Gunners lamin an defender pawimawh an chân tak avangin goal engzat nge an khung belh ang tih chu zawhna a ni.

Brazilian defender Luiz hian tun season Premier League-ah penalty vawi thum a chawi tawh a, ani aia chawi hnem an awm lo. Minute 65 chhung vel mahni ṭhiante tlem zawk ni tura khelmual chhuahsan kha a hrehawm ang, chutihrualin tun ṭum thil thlengah erawh a bul ṭantu chu Mustafi a ni thung.

German defender Mustafi-a'n a tihsual hliah khuh nan Martinelli puihna a mamawh, corner aṭanga ball kal Mustafi tauh chhuah chu kum 18 mi Martinelli-a'n chang fuhin chak takin a tlanpui. Blues midfielder N'Golo Kante chu lo dang thei tura ngaih ni mah se a tlu sual - Brazilian rawlthar hian keeper Kepa Arrizabalaga thlengin a paltlang vek.

Goal ropui khung tur hian yard 67 zeta thui chu second 13 chhunga a tlan thlen bakah, khawvel keeper manto ber hmaah rilru fim takin thutlukna a siam.

Hun tawp nan minute ruk chauh a awm tawh, Chelsea captain Azpilicueta chuan hnai tak aṭangin a khung - chakna goal a nih ngei a rinawm hman. Mahse, Arteta enkawl Gunners an beidawng duh bik lo, captain armband hrengtu Bellerin chuan player pahnih ven karah rin loh takin goal a khung.

Inkhel thunun tak chungin Chelsea an chak zo lo a, an match hnuhnung zawka Newcastle an hmachhawn ṭumin hun tawp dawna an goal chhuah vangin an chak lo tawh bawk. Gunners tan erawh Stamford Bridge aṭanga point khat hlawhchhuah theih kha chanchin ṭha a ni.