Mizoram Cricket-in kawng dik an zawh ṭan

Vijay Hazare Trophy 2019-20 ah Mizoram chuan an match hmasa berah Arunachal Pradesh chu wicket sarihin an hneh. Vawiin hian Dehradun-ah Mizoram hian Assam an hmachhawn lehnghal ang.

Nimin inkhelah hian Arunachal-in vuak hmasak thlangin over 50-ah 267/7 an siam. Mizoramin over 45.4-ah run 268/3 siamin target hi an umpha a, hnehna an chang.

Mizoramin professional cricket an khelh a, an hmachhawn hmasak ber chu Arunachal Pradesh an ni. Nikum khan Mizoramin bat hmasak an thlang a, run 234 siam mah se Arunachal-in over thum dah bangin wicket liin an chak.

Kuminah Arunachal Pradesh nen bawk Mizoramin bul an ṭan a, an intawn hmasak ṭuma century siamtu Samarth Seth-a'n century a siam nawn. Arunachal hian run 267/7 an siam phak avangin chakpui tham niin a lang a, chutihrualin Chhinga Veng CC player Sumit Lamba-a'n wicket hnih lain run 35 chauh a pe.

Mizo player G. Lalbiakvela bakah state pawn player pathum Taruwar Kohli, KB Pawan leh Abrar Kazi ten wicket khat ṭheuh an la bawk.

Mizo pahnih Saidingliana Sailo leh Lalhmangaiha (Amatea) ten bul an ṭan a, Dawrpui tlangval Amatea chetfuh ṭum ni lo mah se Siaha tlangval Saidinga'n run 26 (45) a rawn vaw chhuak.

Nikuma Mizoram innghahna Kohli-a'n beisei pha lo mah se KB Pawan-a century 108*(98) leh Abrar Kazi run 87*(88) siam hmangin hnehna an chang. Mizoram coach PV Shashikant chuan, "Pre season thla khat kan nei thei a, player fitness leh skills-ah nasa takin hmasawnna a awm. Professional player pathum lakte an ṭha a, team ṭhatna tura kawng engkima min puitu CAM chungah kan lawm takzet a ni," tiin a sawi.

Mizoram tan ni chhinchhiah tlak a ni a, season liam ta khan inelna pathum Ranji Trophy (Ni 4 chhung khelh), Vijay Hazare Trophy  (Over 50) leh Syed Mushtaq Ali Trophy (T20) inelna an hmachhawn chungin Vijay Hazare-a Sikkim an hneh bak hneh an nei lo.

Kuminah erawh Mizoram hian an match hmasa berah Arunachal Pradesh an hneh nghal a, wicket thum lek hlohin target 250 chuang an umpha. Chutihrualin hriat tel tur erawh Arunachal Pradesh hian nikum Vijay Hazare Trophy-ah Mizoram leh Sikkim chauh an hneh.

Saidingliana Sailo

Bobby Zothansanga

Lalhruaimawia

Lalhmangaiha

Sumit Lama

G. Lalbiakvela

Parvez Ahmed

K. Vanlalruata

Taruwar Kohli

KB Pawan

Abrar Kazi

Reserves

Lalhruaizela

Lalruatdika

C. Lalrinsanga

Lalnunkima Varte

K. Lalhmingmawia 

Manager : P. Lalremruata (Makuka)

Coach : PV Shashikant

Trainer : Suhas Pawar

Physio : Nanda Kumar

Sept. 25, 2019    Assam Vrs Mizoram 

@ Tanush Cricket Academy

Sept. 27, 2019    Pondicherry Vrs Mizoram 

@ Rajiv Gandhi Stadium

Sept. 30, 2019    Nagaland Vrs Mizoram 

@ Tanush Cricket Academy

Oct. 4, 2019    Mizoram Vrs Sikkim

@ Tanush Cricket Academy

Oct. 6, 2019    Meghalaya Vrs Mizoram

@ Rajiv Gandhi Stadium

Oct. 9, 2019    Manipur Vrs Mizoram 

@ Abhimanyu Cricket Ground

Oct. 12, 2019    Uttarakhand Vrs Mizoram 

@ Abhimanyu Cricket Ground

Oct. 16, 2019    Mizoram Vrs Chandigarh

@ Rajiv Gandhi Stadium