Wuhan Open-ah Kerber leh Wozniacki an tla

China rama tennis inelna ngaihhlut pakhat Wuhan Open-ah player langsar pahnih Angelique Kerber leh Caroline Wozniacki te chu hneh nei loin an chak lo nghal.

Thawhṭanni zan inkhelah world number 18 Wozniacki hi number 32 Hsieh Su Wei lakah 7-6 (2), 1-6, 2-6 in a chak lo. Chinese Taipei nula hian second round-ah chuan Russian player Svetlana Kuznetsova a hmachhawn leh ang.

Rio Olympic final match-a inkhel pahnih Kerber leh Monica Puig te an intawng leh a, Puerto Rico nula hian Brazil khawpuia hnehna a chan kha a tih fuh satliah a ni lo tih lantir nan Kerber hi 7-6 (5), 5-7, 6-1 in a hneh.

Inkhel dangah vawi hnih champion tawh Petra Kvitova erawhin harsatna liantham a tawk lo. Kum 2014 leh 2016 Wuhan Open champion hian darkar khat leh minute 42 chhungin Polona Hercog chu 76, 6-3 in a hneh a ni. Champion lai Aryna Sabalenka pawh a chefuh, Belarusian nula hian Danielle Collins chu minute 51 chhung lekin 6-1, 6-0 in a sawp a, vawi sarih aces a siam bakah a khingpui service hi vawi ruk ngawt a chhuhsak.