Sindhu-i coach Kim Ji Hyun a bang

India nula badminton khel thiam PV Sindhu-i foreign coach Kim Ji Hyun chu a hna aṭangin a bang, a hna a bansan chhan hi a pasal hriselna a ṭhat tawk loh vang a ni.

Ju Hyun-i pasal Ritchie Marr hi a hrisel lo a, neuro stroke vangin New Zealand-ah enkawl a ngai. A pasal bulah hun tam zawk hman a duh vang leh, chhungkua ngaih pawimawhna vangin coach a nihna a bansan rih.

Indian badminton chief coach Pullela Gopichand chuan, "Kim-i pasal hi World Championship khelh lai khan a dinhmun a ṭha lo tawh, inelna zawh rual khan hmanhmawh taka a haw pawh a ngaih phah. Thla li aṭanga thla ruk chhung vel uluk taka enkawl a ngaih avangin hna a chawlhsan rih," a ti.

Korean coach Kim kaihhruaina hnuaiah Sindhu hian thla li chhung training a nei hman a, tun hnaia world champion a nih theih nan pawha tha thawhhlawk berte zinga mi a ni. Ani a awm loh takah chuan Sindhu hian mamawh hunah men’s singles coach Part Tae Sang puihna a dawng thei tho ang.

World number 5 Sindhu chuan, "Gopi leh Kim te kaihhruaina hnuaiah khan training ka nei a, Kim khan ka khelh ṭhin dan phung ṭhenkhat min thlaksak. Attacking game na taka ka khelh ṭhin kha min chhawm nun tir bakah mahni inven dan min hrilh hnem hle.

"Min kaihhruai dan kha ka duhin kawng tam taka hmasawnna min siamsak a ni," a ti. Sindhu-i pa P V Ramana pawhin Kim-i kaihhruaina hnuaia a fanu hmasawnna chu hun ri lote chhungin hmuh theih a nih thu a sawi ve bawk.