India U18 an ropui lo

AFC Under 16 Championship 2020 khel tura India U16 an tlin hnu lawkah Blue Tigers U18 ten an naute angin result ṭha an nei ve thei lo a, SAFF U18 Championship-a an match hmasa berah Bangladesh chu goal khung loin an inhnehtawkpui. 

India coach Floyd Pinto chuan, "Bangladesh khan player 10-in an goal an veng a ni ber a, goal khung tuma theihtawp an chhuah reng avangin ka naute ka chhuang takzet a ni," a ti. SAFF U18-ah hian India hi group B-ah Bangladesh bakah Sri Lanka nen an awmho a, vawiin tlai dar 3:00-ah Sri Lanka nen hian match hnuhnung ber an khel dawn - chak an mamawh. 

Group B aṭang hian team pahnih chu semifinal lut tur an ni a, Bangladesh hian 3-0 a Sri Lanka an sawp tawh avangin tling chiang tawh an ni. India squad-ah hian Mizo goalkeeper Lalbiakhlua Jongte, midfielder pahnih Lalrampana Pautu leh Vanlalruatfela Thlacheu te chu an tel.