Man City-in fiahna paltlang

Manchester City-in Premier League nomawi humhim an beisei tawh lo a, pahnihna dinhmun erawh an la hauh na hle. Pep Guardiola hote hian Inrinni zan khan anmahni hnaih bertu Leicester City 1-0 in an hneh a, Gabriel Jesus-a'n minute 80-naah goal awmchhun a khung.

King Power Stadium-ah goal chance hmuh tur a tam a, first half-ah Jamie Vardy-a'n goal ban a pet per a. Man City pawhin chance an hlah hnem a, minute 62-naa Sergio Aguero penalty chu Kasper Schmeichel-a'n a dan sak.

Schmeichel hian Premier League-a penatly vawi li a danna chiah a ni a, a pa Manchester United legend Peter Schmeichel-a'n Premier League a khelh chhung zawna a penalty dan zat vawi thum a khum.

Danish keeper Schmeichel hian penalty dang mah se minute 80-naa Gabriel Jesus erawh dan rual a ni lo. Man City-in point thum hlu tak an hlawh chhuak a, Foxes aiin point sarih an sang ta zawk.

Pep Guardiola chuan, "Team ṭha Leicester lakah kan khel ṭha a, a tawp thlenga beiseina kan nei tlat khan minti lawm. Penalty vawi li a zawnin kan hlah ta a, kan khung hunah chuan inkhel pawimawh tak a ni ngei ang," tiin inkhel chungchang a sawi.

Man City hian Nilaini zan hian Santiago Bernabeu-ah Real Madrid an tlawh dawn a, Champions League an la champion loh bakah hrem theih dinhmuna an din avangin inkhel pawimawh bik a ni ang.