FIFA Fifpro Men’s Team of the Year Manchester City-in player an thawh lo!

Thawhṭanni zan khan Teatro alla Scala, Milan-ah Best FIFA Football Awards ceremony neih a ni a, hetah hian FIFA Fifpro Men's Team of the Year puan nghal a ni.

Player 11 thlanchhuah zingah England-a inelna pathuma champion thei Manchester City-in player an thawh lo a, Champions League champion Liverpool player pawimawh Sadio Mane, Mohamed Salah, Trent Alexander-Arnold leh Andrew Robertson te tan hmun a awm lo.

Liverpool goalkeeper Alisson chu Manchester City keeper Ederson leh Barcelona keeper Marc-Andre ter Stegen te aiin an thlang. Brazil keeper Alisson hian UCL nomawi bakah Copa America-ah an ram a champion pui. Liverpool defender rinrawl Virgil van Dijk  leh a hnampui Ajax aṭanga hming chher Matthijs de Ligt te chu tlarhnungah an awm a, midang pahnih erawh Real Madrid player an ni daih - Sergio Ramos leh Marcelo te an tel! Los Blancos hi season liam ta khan an tiatpui tel lohna FIFA Club World Cup-ah  chiah an champion.

Midfield lamah pawh Real Madrid midfielder Luka Modric hming a la lang tlat bawk. Croatian midfielder hian season liam ta khan match 46 zet khel mah se goal li chauh a khung.

Real forward thar Eden Hazard erawh Europa League-a Chelsea champion puitu a ni a, Barcelona midfielder  Frenkie de Jong pawh Ajax tana a hnathawh avangin team of the year-a tel hi a inhmeh hle. Tlarhmaah a sang pathum zinga tel pha Lionel Messi leh Cristiano Ronaldo te bakah French rawlthar Kylian Mbappe a awm. Amaherawhchu Mbappe hian FIFA Men's Best Player-a vote hmuh tam lamah Mane leh Salah te a tluk lo.

Goalkeeper - Alisson (Liverpool/Brazil)

Defenders - Matthijs de Ligt (Ajax and Juventus/Netherlands), Sergio Ramos (Real Madrid/Spain), Virgil van Dijk (Liverpool/Netherlands), Marcelo (Real Madrid/Brazil).

Midfielders - Luka Modric (Real Madrid/Croatia), Frenkie de Jong (Ajax and Barcelona/Netherlands), Eden Hazard (Chelsea and Real Madrid/Belgium)

Forwards - Kylian Mbappe (Paris St-Germain/France), Cristiano Ronaldo (Juventus/Portugal), Lionel Messi (Barcelona/Argentina)

Goalkeeper: Sari van Veenendaal (Arsenal and Atletico Madrid/Netherlands)

Defenders: Lucy Bronze (Lyon/England), Wendie Renard (Lyon/France), Nilla Fischer (Wolfsburg and Linkopings/Sweden), Kelley O'Hara (Utah Royals/USA)

Midfielders: Amandine Henry (Lyon/France), Julie Ertz (Chicago Red Stars/USA)

Attacking midfielders: Marta (Orlando Pride/Brazil), Rose Lavelle (Washington Spirit/USA), Megan Rapinoe (Reign FC/USA)

Striker: Alex Morgan (Orlando Pride/USA)