Best FIFA Football Awards, Messi a thiam ber - VVD a khum

FIFA chuan Thawhṭanni zan khan Best FIFA Football Awards a sem chhuak a, chawimawina ngaihhlut ber Best FIFA Men's Player chu Lionel Messi hnenah hlan a ni. 

Argentine forward hian he chawimawina dawng tur hian UEFA Men's Player of the Year ni lai Virgil van Dijk leh Juventus forward Cristiano Ronaldo a khum. Liverpool tana Champions League nomawi chawitu Jurgen Klopp chu coach ṭha ber atan thlan a ni a, Reds si ban nghaktu Alisson Becker chuan Best Goalkeeper chawimawina a dawng.  

United States forward Megan Rapinoe chu hmeichhe player ṭha berah thlan a ni a, Women's World Cup 2019-ah khan USA a champion pui a ni. 

UEFA Men's Player of the Year-a VVD thlan a nih avangin mi tam zawkin Dutch defender hi Thawhṭanni zanah pawh chawimawina dawng turin an ngai a, mahse a ni lo. 

Lionel Messi zawk thlan a ni a, kum 2015-a Ballon d'Or chawimawina a dawn hnua Argentine forward-in mimal chawimawina liantham a dawn leh hmasak ber a ni. Barcelona forward chuan, "Mimal chawi-mawina ka dawn lohna a rei ta a, he award ka dawng thei hi ka lawm takzet a ni," a ti - Ballon d'Or vawi nga a dawng tawh a, FIFA World Player of the Year-ah vawi khat thlan a ni tawh bawk. 

Messi hian season hman zawh takah khan La Liga nomawi a chawi a, ram leh club tan match 58-ah goal 54 a khung a, assist vawi 20 a nei a, minute 86 dana goal khung zel ang a ni. 

A hming chu Klopp 

Liverpool fan-te ngainat rawn leh inkhel hmuhnawm pho chhuak ṭhintu Klopp chuan Manchester City boss Pep Guardiola leh Tottenham manager Mauricio Pochettino khumin coach ṭha ber chawimawina a dawng. 

Kum 2005 hnua a vawi khat nana Champions League-a Liverpool champion puitu coach hian Premier League-ah point 97 hmuin Reds chu pahnihna a nihpui bawk. 

Klopp chuan, "Kum 20, 10, nga leh li liam taah kha chuan tumahin he hmuna ka rawn dinchhuah hi an beisei lo ang. Poch leh Pep hnathawh ropuizia kan hre vek a, ka club Liverpool FC chungah lawmthu ka sawi a ni. "Team ṭha tak min pek avangin club neitute chungah ka lawm a, coach ṭha taka min siam avangin ka team-te chungah ka lawm a, heng player rual ka enkawl thei hi ka inchhuang takzet a ni," a ti. 

Player of the Year    Lionel Messi (Argentina/Barcelona)  

Coach of the Year    Jurgen Klopp (Germany/Liverpool)

Goalkeeper of the Year    Alisson Becker (Brazil/Liverpool)

Player of the Year    Megan Rapinoe (USA/Reign FC)

Coach of the Year    Jill Ellis (USA)

Goalkeeper of the Year    Sari van Veenendaal (Netherlands/ Atlético Madrid)

Chawimawina dang

Puskas Award    Daniel Zsori (Debrecen v Ferencvaros)

FIFA Fair Play Award    Marcelo Bielsa & Leeds United 

Leeds United leh an manager Marcelo Bielsa hnenah fair play award hlan a ni. April khan Championship match-ah Aston Villa leh Leeds chu 1-1 in an inhnehtawk a, he inkhela Bielsa chet danin mipui rilru a hneh. Villa player-ten ball kal lai a tawp emaw an tih karah Leeds hian sawisel theih takin goal an khung a, hei hi Bielsa chuan duh loin a player-te chu Aston Villa hi goal khung let tir ve turin a hrilh a ni.