Mizoramin final round an lut

Santosh Trophy Qualifying round-ah Mizoram chuan nimin tlai khan inelna thlengtu Tripura 2-1 in an hneh a, group A inkhel dangah Arunachal Pradesh leh Assam te 2-2 a an inhnehtawk avangin final round an lut.

Umakanta Mini Stadium, Agartala-ah ruahpui vanawn a sur avangin awmze nei game a khelh theih loh. Mizoram harsatna belhchhah turin PC Laldinpuia penalty chawi vangin Tripura-in minute 64-naah Faslu Rahman hmangin hma an hruai.

Coach Lalremtluanga'n hun harsaah tawnhriat ngah leh ball pet thiam Jacob Lalrawngbawla a luhtir a, ani hi 2014 Santosh Trophy-a Mizoram champion ṭuma vice captain V. Lalṭanpuia (Ṭ-a) nau a ni. Tlungvel tlangval Jacob-a freekick pet chu minute 67-naah Serchhip tlangval Vanlalnghenga'n a tlawh goal a, point khatah Mizoram an lungawi lo. Hnehna chan tumin an nawr chhunzawm a, Vanlalthanga ball pek um luttu captain Lalbiakhlua chuan petna tur khawp a insiam hnuah minute 74-naah chakna goal a khung.

Santosh Trophy-ah head to head en an nih avangin Assam hnehtu Tripura tan Mizoram chunga awm theih a ni tawh lo. Mizoram hian kumin kumtir khan final round lut lo mah se tun ṭumah erawh match khat khelh hmabak nei chungin final round an lut.

Mizoram manager Lalenghluna (Maenga) chuan, "Kan ṭawngṭaina leh min ṭawngṭaipuitute ṭawngṭai chhanna a ni a, kan lawm takzet. Tripura nen hian ruah sur vangin a inkhelh theih loh a ni ber a, kan chak danah inchhuang thei kan awm lo," tiin Vanglaini a hrilh.

Vawiin hian group B match khat a awm dawn a, Manipur chelhtu Nagaland-in tlai dar 3-ah vawi khat inlanna tur Meghalaya an hmachhawn ang.