Barca tan chanchin ṭha a thleng thei lo

Duhawm lo taka season bul an ṭan hnuah Barcelona-in Thawhlehni zan khan Villarreal chu 2-1 in an hneh a, an lawm a kim chuang lo. 

Lionel Messi chuan tun season-a a vawi khat nan inkhel bul ṭan mah se hliam vangin lakchhuah zui a ni a, Barca fan-ten an thiampuipa chhuak lai ngui takin an thlir. Catalan club tan hian Antoine Griezmann leh Arthur ten goal khat ve ve an khung a, mikhual team tan Santi Cazorla chuan goal khat a khung ve bawk. 

Villarreal tana goal khungtu Cazorla hi kum 2016 lawka, "Kea i kal leh thei a nih chuan lawm hle rawh," an tih kha a ni a, Barca laka a goal hi goal mawi bik a ni. 

Nou Camp-a inkhelah Barca fan-ten Messi inkhel bul ṭan an hmu a, point thum aia tlem an beisei lo nghal - minute rukah an duhna chu chhanin a awm nghal bawk. 

Messi corner aṭanga ball kal chu Griezmann-a'n goal hmahruai ni turin a khung a, Barca-in inkhel an thunun chhunzawm. Catalan club hian an duhtawk mai lo. Goal an khung aṭangin minute kua a liam hman chauh a, an goal hnihna an khung zui. Arthur chuan Sergio Busquets hnen aṭanga a ball hmuh chu box pawn aṭangin chiang zetin a khung. 

Barca-in minute 15 chhung lekin goal hnih an khung hman a, fan-ten goal tam zawk hmuh an beisei. Khelmualah Messi a tel miau a, fan-te beiseina a awm lo hran lo. 

Barca fan-ten goal hmuh belh an beisei laiin Villarreal zawk an lo lang a, kum 34 mi Santi Cazorla chuan football mangṭha turin a la inpeih lo tih pholangin mawi zetin si phurh a rawn sut ṭhen.

Spain tana vawi 78 inlan tawh midfielder hi September 2013 khan ram tana a inlanna lamah Chile lakah a inhliam a, November 2015-ah Arsenal tana a inlanna lamah a inhliam nawn. Kum 2016-ah Gunners tan Champions League-ah Ludogorets an hmachhawn zuiin a inhliam leh a, a ṭang zo tawh lo - hetihlaia amah enkawltute chuan, "Kein i kal leh thei a nih chuan i lawm dawn nia," tiin an hrilh. 

Mahse, Santi hian tumruhna nen a bei a, Nou Camp-ah, Barcelona lakah ngei mawi zetin goal a khung leh ta - minute 77-naah lakchhuah a nihin Nou Camp-a fan-te chuan ding chungin an zahna an lantir hial. 

Hun tawp thlengin team pahnihin goal dang an khung tawh lo a, a tawpah Barca-in 2-1 in hnehna an chang - mahse Messi a inhliam miau a, Nou Camp boruak a nung thei lo. 

Best FIFA Men's Player-a thlan hlim hi first half tawp hma hretin a inhliam a, chawlhlawk a nih thleng chuan a club tan hian a khel lui. Mahse, second half-ah Messi a inlan zui thei tawh lo a, amah ang thoa hliam vanga chawl reng Ousmane Dembele chuan an thiampuipa hi a thlak. 

French striker hi tun season La Liga-a an match hmasa bera Athletic Bilbao nen an inhmachhawn ṭumin a inhliam a, Villarreal-a hmachhawn hi hemi hnua a inlan lehna hmasa ber a ni. 

Barca fan-ten inkhelh zawhah thlamuanna thu an ngaithla a, Ernesto Valverde chuan an captain inhliam chu hlauhthawnawm a nih loh thu a sawi. 

Barca boss chuan, "Messi chunga thil a thlen tawh hi chuan mi zawng zawng hi an chawl ṭhuap zel a ni ber mai. Hliam hlauhawm tak erawh a ni lo a, inven nan kan la chhuak mai a ni. "Tun dinhmunah chuan hlauh tur engmah a awm lo a, a chiang thuai ang," a ti a, he thu buatsaih lai hian Messi dinhmun dik tak puanchhuah a la ni lo. 

Messi hi hliam vangin a lo kir ve chauh a ni a, kum 32 mi a nih tawh bawk avangin Barca fans tan ngaihngam taka awm erawh a la harsa thoin a rinawm.