Best FIFA Football Awards-ah Ronaldo tel lo

Milan khawpuia Best FIFA Football Awards semnaah Cristiano Ronaldo a tel lo a, FIFA FIFPro Men's Team of the Year-ah tel mah se a hming lam a nih laiin stage lam pan turin Ronaldo hmel hmuh tur a awm lo. 

Thawlhlehni zan khan Juventus hian Serie A match-ah Brescia an lenchilh a, an inkhelh hun hi Milan khawpuia FIFA Awards sem a nih aṭanga darkar 24-na lek a ni bawk. Portugal captain zin loh chhan tak erawh hliam tenau a neih vang a ni. Turin club tan league match-ah pawh a inlan lo a ni.

Mahse, Juventus tana Ronaldo khelhpui Matthijs de Ligt chu Milan khawpuia awards sem chhuahnaah hian a tel tho - Milan hi Juventus innghahna Turin leh Brescia inkara awm a ni hrim hrim a, kal duh ta se Ronaldo tan hian harsatna a awm lo. 

Nizana La Liga match nei Lionel Messi chu Milan-ah hian a kal tho bawk a, Spain-a kir turin minute 90 chhung thlawhtheihnaa kir a ngai - Ronaldo aiin hun a mamawh tam zawk tihna a ni. Hetihlai hian Ronaldo chuan instagram lamah ina a hahchawl lai thlalak a pholang a, midang fuih phurna turin thu a ziak duah bawk. 

Ronaldo hian, "Amateur leh Professional ṭhen hrangtu pawimawh tak chu dawhtheihna leh tih hram hramna hi a ni. Vawiina thil ropui takte hi engmah lo aṭanga inṭan vek an ni. Thil zawng zawng i ti thei lo a ni mai thei a, mahse i beiseina ti hlawhtling turin i theih apiang chu ti rawh - hei hi theihnghilh ngai suh ang che, zan thim hnuah khua a var ṭhin tih hi," tih chu a ziak a ni.