Mizoram hmaah Assam

Santosh Trophy Qualifying round-ah Mizoram chuan vawiin tlai dar 3:00 hian Umakanta Mini Stadium, Agartala-ah Assam an hmachhawn dawn. Coach Lalremtluanga kaihhruai team hian Arunachal Pradesh leh Tripura an hneh avangin final round an lut tawh a, Assam nen hian hahdam zawkin an khel thei ang.

Mizoram hian keeper F. Lalmuanawma chu dar pelh vangin an la chhawr thei dawn lo a, Lalnunzama (khup hliam) leh Jacob Lalrawngbawla (kheimit vung) vangin an hahdamtir a rinawm. Manager K. Lalenghluna (Maenga) chuan, "Pressure awm miah loin hahdam takin kan khel tawh ang. 

Tun ṭum hi kan team balance a ṭha riau a, tu pawh hi lut sela, an rintlak vek a ni," tiin Vanglaini a hrilh a, Assam lakah khelhna hmun chang tlem deuhte an lut a nih pawhin a mak lo ang. Mizoram khingpui tur Assam hian an match hmasa berah Tripura an hneh lo a, Arunachal Pradesh nen an inhnehtawk zui avangin beisei tur an nei tawh lo. Chutihrualin NorthEast team ṭha zinga chhiar tel Assam hian chak nei loa qualifying hman zawh an duh lo ang.

Nimin khan group B inkhelah Meghalaya chuan Nagaland an hneh a, hmabak a awlsam sawt. Meghalaya hian Zirtawpni tlai dar 3:00 hian Manipur an hmachhawn ang a, point khat an hlawh chhuak a nih pawhin final round an lut dawn.