Goal phurh hnuah Juventus an chak

Juventus chuan Serie A kai thar Brescia lakah goal phur hmasa zet mah se 2-1 in an lehthal a, manager thar Maurizio Sarri naute hian season kal laiah hneh loh tawng loin an kaltluang mek.

Italian champion hian league match nga an khelh tawhah point 13 an hmu a, table chung berah an awm. An hmahruaina erawh a la nghet lo, nizan khan la chak vek awmchhun Inter Milan chuan Lazio an mikhual, an inkhel result a zirin hmahruaitu hi a danglam thei a ni.

Inkhel dangah an match hnuhnung zawka Juventus ngam lo Hellas Verona chuan Udinese chu goal awm loin an inhnehtawkpui a, point nga hmuin 13-na an ni; Udinese erawh point li chauh an la neih avangin 15-naah an awm thung.

Juventus hian khel bawr hliam tenau neih vangin Cristiano Ronaldo an chhawr thei lo a, Italian manager Sarri-a'n 4-3-1-2 formation hmangin tlarhmaah Paulo Dybala leh Gonzalo Higuain te a dah, anni thlawp tur hian Arsenal midfielder hlui Aaron Ramsey a dah.

League match hnuhnung zawkah Gianluigi Buffon inlan mah se goalkeeper Wojciech Szczesny chu a hmun ngaiah a ding leh tawh a, tlarhnung laiah Leonardo Bonucci kiangah Matthijs de Ligt a ding leh bawk. Midfielder Adrien Rabiot pawhin Bianconeri tan a vawi khat nan bul a ṭan.

Juventus khingpui Brescia hi Serie A kaithar an ni a, player langsar an ngah lo. Mahse, Mizo ten kan hriat lar Mario Balotelli an nei thung. Manchester City leh Liverpool striker hlui hian season hmasa tawp lama match li hrem a tawrhna a hmang zo a, an khaw club tan a inlan.

Stadio Mario Rigamonti-a inkhelah beisei loh tak maiin Brescia lamin minute lina lekah goal an khung. Midfielder Alfredo Donnarumma chuan angle zim deuh tak aṭangin keeper Szczesny dan theih loh turin a khung.

Sarri naute an khel ṭha zawk a, tlarhma lamah Dybala leh Higuain ten ball in pe kual mawi viau ṭhin mah se goal erawh an nei thei mai lo, mualneitu lam tan Balotelli a hlauhawm zauh zauh bawk. Chawlhlawk hma deuhin Brescia an vanduai, defender Jhon Chancellor chuan corner aṭanga ball kal chu anmahni lamah a ti lut a, scond hlaf-ah Juve tan Bosnia-Herzegovina midfielder Miralem Pjanic chuan Dybala freekick pet per let changin hla tak aṭangin chakna goal a khung.

Juevntus manager Sarri chuan a naute khelh danah a lawm thu a sawi a, chutihrualin team dang an chet ṭhat tluan ve reng avangin nomawi humhim tur chuan hmasawn an la mamawh nasat thu a sawi chhuak.

Chelsea manager hlui chuan, "Ball kan chang hnemin inkhel pawh kan thunun chho zel, hmasawnna lawmawm tak a ni. Ball kan chan hnem hi chuan kan tlarhma lam tan pawh goal khung theihna kawng a inhawng zau a, chhunzawm pawh kan tum dawn.

"Mahse, a bik takin tlarhnung a la phui lo hle. Captain Giorgio Chiellini inhliam vangin kan buai tih chu kan hre vek, chutihrualin ani ang thoa theihna nei sang Matthijs de Ligt kan nei, ani hian tawnhriat a ngah hunah leh Italian football a man hunah chuan harsatna a kiang ang," a ti.

Italian manager hian Dybala khelh danah a lawm thu a sawi a, Argentine forward leh midfielder Ramsey ten mawi tak taka ball an inpe kual chu hnuhnawm leh khingpuite tana dan harsa a nih chhunzawm tur thu a sawi bawk.