Colchester-in Spurs barakhaih

League Two club Colchester United chuan Premier League club ṭha Tottenham Hotspur chelhin hun pangngaiah goal a lut lo a, Carabao Cup fourth round lut turin penalty shootout-ah 4-3 in an chak. Champion lai Manchester City erawhin harsatna nei loin Preston North End 3-0 in an hneh.

Colchester hi third round khel zinga rank hniam ber a ni a, chutihrualin Spurs hmachhawn tur hian Premier League club Crystal Palace chu penalty shootout hmang bawkin an hneh.

Tottenham manager Mauricio Pochettino-a'n Leicester City an hneh loh ṭuma bul ṭantu zing aṭangin goalkeeper Paulo Gazzaniga chiah bul a ṭan nawntir a, hei vang hian chauh vanga chhuanlam siam a rem lo.

Chutihrualin bul ṭantute Lucas Moura, Delle Alli leh Eric Dier te an nih hlawm avangin Colchester laka chak tur an ni a, bench aṭangin Son Heung-Min, Christian Eriksen leh Erik Lamela te an lut. Spurs hian 75% ball possession an nei a, shot pawh vawi 19 zet an nei. Hetihlai hian Colchester hian Premier League club goal zawnah vawi khat pawh an pet loh avangin penalty hmanga chak zawk zawn a ṭul.

Spurs tan Eriksen, Dele Alli, Lamela, Son leh Moura te rawn chhuakin Liverpool nen UCL final an khelh ṭuma squad-a awm ṭhiau an ni a, amaherawhchu Real Madrid nen pawha sawi zawm Eriksen-a'n a hlah hmasa ber a, a tawp bera pettu Moura-a'n goal zawnah a pet thei lo.

Colchester tan Jevani Brown-a'n panenka a mualpho pui a, midang zawngin an pet goal vek. League Two club-in hnehna an chan chiah hian anmahni ṭantute lamah tlan phei nghalin inkhel entu khelmualah an rawn tlan lut a, Colchester tan hun chhinchhiahtlak a ni.

Spurs erawhin UCL-a Olympiakos an hmachhawn ṭumin goal hnih an khung hnuah an insut zawhtir a, Leicester City lakah goal khung hmasa mah se an inlehthaltir a, tuna Colchester an hneh loh leh takah chuan hun harsa 

an tawng mek.