Osaka hmachhawn tur Gauff
Australian Open khelh laiah chanchin ngaihnawm a awm chhunzawm zel, tleirawl duhawm Coco Gauff leh champion lai Naomi Osaka te chu Zirtawpni hian third round-ah an intawng dawn.
Nimina second round inkhelah world number 67 Gauff hi a dinhmun a chhe hman hle, set hnuhnung ber an khelh laiin 3-0 in a hnufual hman. Mahse, huaisen taka tho chhuak lehin Sorana Cirstea chu darkar hnih leh minute ruk hnuah 4-6, 6-3, 7-5 in a hneh.
American tleirawl hian a match hmasa zawkah Venus Williams a hneh tawh bawk a, season hmasa chawhnu lam ang bawkin kuminah hnuhma a nei ṭha chhunzawm. Kum 15 mi Gauff chuan, "Australia ramah hetiang taka mipui thlawpna ṭha hi ka hmuh ka beisei phak lo.
"Ka tan chuan thlawpna ṭha hmuh tluka nuam a awm thei chuang lo, thil mak leh ropui chu ka tawng mek a ni," a ti. Australian Open hi a vawi khat khelhna a ni a, a thlen chin apiang hi a tan record a ni nghal zel.
Champion lai Osaka pawhin harsatna a tawk lo, Japanese nula hian Saisai Zheng chu 6-2, 6-4 in a hneh; hnehna chang tur hian darkar khat leh minute 20 chhung hun a hmang - Gauff nen an intawng leh tur hi a hmuhnawm ang.
Osaka leh Gauff te hi nikum September thla khan US Open third round-ah an intawng tawh a, kum 22 mi Osaka zawk hian set hloh loin hnehna a chang. Grand Slam vawi hnih champion tawh chuan, "Inelna hmuhnawm a nih ka beisei, player ṭha tak a ni," tiin a khingpui tur chungchang a sawi.
Inkhel dangah world number 1 Ashleigh Barty chuan darkar khat chhung vel lekin Polona Hercog chu 6-1, 6-4 in a hneh - season hmasa quarter finalist hian kuminah final thlen a beisei sang viau.
Caroline Wozniacki chu set hmasa zawkah 5-1 zeta a hnufual hnuah tho chhuak lehin seeded 23-na Dayana Yastremska chu 7-5, 7-5 in a hneh. Denmark nula hian a match lehpekah chuan Johanna Konta hnehtu Ons Jabeur a hmachhawn leh ang.
Nimin khan hmeichhe player langsar dang - Grand Slam vawi 23 champion tawh Serena Williams, Petra Kvitova, Sofia Kenin, Julia Goerges leh Carla Suarez Navarro te pawhin an khingpui
ṭheuh an hneh a ni.