Solskjaer a vannei, United hmaah Chelsea ding dawn

Nilaini zan khan Manchester United-in Carabao Cup fourth round an lut a, amaherawhchu an mual Old Trafford-ah League One club Rochdale chu penalty hmanga an hneh ṭawk avangin Ole Gunnar Solskjaer hote an vannei takzet.

United hian last 16-ah Chelsea an hmachhawn dawn a, Frank Lampard hote hian League Two club Grimsby Town 7-1 in an sawp thung. October 28 aṭanga khelh ṭan tur fourth round-ah hian champion lai Manchester City chuan Southampton an hmachhawn ang.

Manchester United-in Paul Pogba leh Mason Greenwood an chhawr thei a; Fred, Andreas Pereira, Jesse Lingard leh Tahith Chong te nen tlarhmaah an awm bawk.

Axel Tuanzebe-a'n captain armband hrengin Phil Jones nen an inkawp a, mual sirah Marcos Rojo leh Aaron Wan-Bissaka te an awm. David de Gea awltir a ni a, Sergio Romero a inlan thung. Rochadale lamah hming langsar awm lo mah se right wing back Luke Matheson (kum 16) leh bench-a ṭhu Peter Thomas (kum 15) te chu an kum a naupan avangin an hming an lam ri tam hle.

World Cup nomawi chawi tawh Pogba meuh pawhin Old Trafford a mawi zo lo a, United player-ten ball chang tam mah se tihsual a tam bakah goal hmaah an bil. Solskjaer-a'n kum naupang chungah rinna a nghat a, goal bula an chet dan vel thlir chuan United legend ṭhenkhatin Premier League-a top six-ah pawh an awm an rin loh chu thil mak a ni lo.

Chutihrualin kum 19 mi Chong leh Rochdale rawlthar Matheson inveng chu hmuhnawm a tling. United tana chanchin lawmawm erawh defender lai Tuanzebe a rintlak hle. Solskjaer hoten inkhel thunun viau mah se inkhela chance ṭha ber chu Rochdale midfielder Callum Camps-a'n a hlah a, Wan-Bissaka-a'n goalline aṭangin a pet chhuak hram.

Mualneituin chance ṭha an insiam hnem rah an seng a, Europa League-a chakna goal khungtu Greenwood-a'n minute 68-ah goal a khung. Solskjaer-a'n goal khung thei bik tiha a fak English striker hian patuaina deuh a la nei nachungin a kum zat en tel chuan a ṭha tih hmaih theih a ni lo.

United ngaih ṭha takin awm hman mah se minute 76-naah Matheson-a'n Rochdale siphurh a sut. Kum 16 mi goal khung hi player nazawng khung theih a ni lo a, theihna nei sang bik player hian lehkha zir lam pawh a ti thei hle. 

Trinity C of E High School, Manchester-ah school kalin thla liam taa GCSE result chhuakah PE (8) tih loh subject dangah 10 a hmu vek. Football khel lo pawh ni se a thiamna hmangin A Level course-a inziaklut thei a ni a, a entawn tlak hle.

Rochdale-in minute 90 chhungin United an chelh thei a, penalty hmanga chak zawk zawn a ṭul. Argentine keeper Sergio Romero chuan Jimmy Keohane penalty pet a dan avangin United chhanhimtu a ni a, substitute Daniel James-a'n chakna goal a khung.

United boss Ole Gunnar Solskjaer chuan, "1-0 hma kan hruai chuan goal dang kan la khung a ngai. Kan club-ah hi chuan goal khat khunga goal venhim daih hi a rem lo a, goal khat a tawk lo tih kan hriat a ṭul a ni," tiin a sawi a, goal khungtu Greenwood chu defender-te mangchhia thlentu tiin a fak hle

United ang bawka rawlthar hmang nasa Chelsea erawhin Stamford Bridge-ah Grimsby Town 7-1 zetin an sawp. Blues tan hian Michy Batshuayi-a'n goal hnih a khung bakah Ross Barkley, Pedro, Kurt Zouma, Reece James leh Callum Hudson-Odoi ten goal khat ṭheuh an khung.

Season ṭan niah United-in Blues hi Old Trafford-ah 4-0 zetin an sawp a, Solskjaer hote hian an duh aia hmain an hmachhawn leh dawn. Chelsea leh United hi League Cup last 16-ah an inhmachhawn dawn a, an inhelhna tur hmun hi Stamford Bridge a nih dawn avangin Frank Lampard-a hote tan phuba lakna remchang a ni thei ang.