Best Awards vangin Mo Salah lungawi lo?

FIFA Best Awards chu Thawhṭanni zan khan semchhuah a ni a, chawimawina ngaihhlut hlawh ber Best Men's Player-ah Mohamed Salah chu palina a ni. 

Ram tin coach, captain leh journalist (pakhat) ten an duh zawng top three an vote thei a, Egypt captain leh coach-te player duhthlan hmuh tur a awm lo! Egypt journalist aiawha vote thlaktu Hany Danial chuan Sadio Mane a dah sang ber a, Cristiano Ronaldo leh Mohamed Salah ten an zui. 

Hetihlai hian Egypt captain Ahmed Elmohamady leh coach Shawky Ghareeb-te vote thlak dan erawh hmuh tur a awm lo a, vote an thlak ngei thu an sawi si! Salah hian Thawhlehni zan khan social media lama an ram hming 'Egypt' tih a tarlan chu a paih vek a, hei hi an ram aiawhte laka a lungawi loh vang niah media lam chuan an ngai. 

Mahse, Salah hian a hnu lawkah an ram jersey a hakna thlalak tarlangin, "Nang leh a chhunga chengte nena kan inkar hi tih danglam tum ṭhin mah se a danglam thei lo ang," tih thu a ziak tel. Egypt captain Elmohamady chuan, "Vote thlak lo anga sawi ka ni hi a dik lo. Mohamed Salah hi a chung berah ka dah a, Ronaldo leh Mane ka vote bawk," a ti. 

Olympic coach Ghareeb pawhin vote a thlak ngei thu a sawi a, register a ni lo chu mak a tih thu sawiin chhuichian a duh thu a sawi tel. Egyptian Football Association (EFA) chuan FIFA hnenah lehkha an thawn thu an sawi a, Best FIFA Men's Player award-a an ram captain leh coach vote chhiar tel a ni lo chu sawifiah turin an ngen - hriat tel atana ṭha chu Salah leh EFA hian tun hmain buaina an lo nei tawh a, an inkar boruak a ṭha lo.