Santosh Trophy Qualifying Round Match thumah Mizoram an chak vek

Mizoram chuan nimin khan  Santosh Trophy qualifying round match hnuhnung berah Assam 2-1 in an hneh a, Arunachal Pradesh leh Tripura an hneh tawh bawk avangin match thum an khelhah an chak vek.

Umakanta Mini Stadium, Agartala-a inkhelah khua a ṭhat avangin Mizoramin  game mawi an khel thei a, minute 12-naah David Lalchhuanawma'n box pawn aṭangin kawh zetin a khung. Mizoram hian nawr chhunzawmin captain Lalbiakhlua'n minute 28-naah penalty hlawhchhuak mah se Lalrinzuala Khiangte-in goal-ah a chantir thei lo.

First half tawp hma chiahin Assam-in an siphurh an sut a, Mizoramin offside-ah an ngai nachungin khelmual chhunga thu zawk referee-te hmuh dan a dang. Second half-ah midfielder ṭha R. Malsawmtluanga'n fing takin freekick aṭangin ball a rawlh a, Lalsawmzela'n chakna goal khung nan a hmang.

Mizoram manager Lalenghluna (Maenga) chuan, "Player 20 kan hruai zinga pakua hi Under 21 player an ni a, vawi khat kalna hi player 10 an awm. Player thar ṭhahnem tak nena chak vek chunga final round kan lut hi kan lawm takzet a, ṭawngṭai chhanna a ni," tiin Vanglaini a hrilh.

Mizoram coach Lalremtluanga chuan, "MFA-in min ring ngam hi ka lawm. MPL kan chhawr a, an thiam saah kan duh dan tlem kan belh ve chauh a ni. Mizo football tan chuan MPL hi a pawimawh em em a, Mizo mipui pawhin kan league hi kan hlut a ṭul," tiin MFA chungah lawmthu a sawi a, MPL a fak bawk.

Group A

September 22, Pathianni

Mizoram    1 - 0    Arunachal Pradesh

MIZ : Jessy Vanlalmuana 6'

Assam    1 - 2    Tripura

September 24, Thawhlehni

Arunachal Pradesh    2 - 2    Assam

Tripura    1 - 2    Mizoram

TRI : Faslu Rahman Methukayil 64' (P)

MIZ : Vanlalnghenga 67'; Lalbiakhlua 74'

Nimin Inkhel Results

Tripura    3 - 1    Arunachal Pradesh

Mizoram    2 - 1    Assam

MIZ :  Lalchhuanawma 12'; Lalsawmzela 75'