La Liga hmahruaitu Real Madrid

Real Madrid chu La Liga season hman laiah hneh loh nei loin an la kaltluang a, Nilaini zan khan Santiago Bernabeu-ah an mikhual Osasuna 2-0 a hnehin league hmahruaitu an ni.

Atletico Madrid pawhin Mallorca 2-0 in an luhchhuah ve bawk. Madrid club pahnih hi Inrinni zanah an intawng zui dawn a, league hmahruaitu leh an hnuai chiaha awm inkhel tur hi a pawimawh khawp ang.

Zinedine Zidane-a'n kar tawpa match pawimawh an khelh tur a hre ran a, player ṭha ṭhenkhat a awltir - Gareth Bale chu squad-ah telh a ni lo. Eden Hazard leh Karim Benzema te pawh bench lamah hun hman tluantir an ni.

Mikhual lamin bul ṭan fuh mah se Real an chefuh hmasa zawk. Minute 36-naah forward Vinicius Junior chuan tun season chhunga a goal hmasa ber a khung, second half-ah forward Rodrygo chuan an goal hnihna a khung bawk.

Zidane-a naute hian league match ruk khelh tawhah vawi li hnehna an chang a, ṭum hnih dang chu an khingpuite nen an inhnehtawk. Point 14 hmuin pahnihna Atletico Madrid nen an inthlauhna chu point khat chauh 

a ni rih.

Real manager Zidane chuan, "Hun rei tak chhunga kan thawhrimna chu a takin a lang chhuak, tunah chuan hmahruaitu kan ni. Pakhatna kan nih dan erawh a la nghet lo hle, a pawimawh ber chu ṭha taka khelh chhunzawm a ni," a ti.

Inelna hrang hranga match thum chhung chak ni hmel an hmuh loh hnuah Atletico Madrid chuan chak ni hmel an hmu ve leh ta. Striker Diego Costa (26') leh player manto Joao Felix (64') te goal hmangin Mallorca 2-0 in an hneh.

Minute 69-naah Alvaro Morata chuan Costa thlakin bench aṭanga dah luh a ni a, Chelsea aṭanga loan hmanga an hawh striker hian khelmualah minute riat chauh hun a hmang hman tihin yellow card vawi hnih a hmu hman, hnawhchhhuah a ni.

Inrinni zana Real Madrid nen an inkhelh hunah Diego Simeone-a'n Morata hi a chhawr thei dawn lo a, tlarhma lamah Costa leh Felix te an inkawp chhunzawm ang. Argentine manager hian March thla hnua goal khung leh ta Costa a rintawk thu leh inrintawkna a siamsak a beisei thu 

a sawi.

Simeone chuan, "Striker hi chuan goal an mamawh. Costa-a'n goal a khung leh ta hi atan leh team tan a ṭha hle, player thar kan ngah avangin insiamṭhatna hun kan mamawh a, tunah chuan team inbuk tawk tak kan ni tawh," a ti.