Man City tan Sergio Aguero

Bramall Lane-ah bench aṭangin Sergio Aguero a lut a, Argentine forward hian Sheffield United lakah Manchester City tan chakna goal a khung. Pep Guardiola-a hote hian match 24 aṭangin point 51 an hmu a, season tharah Champions League an khelh ngei a rinawm.

Manchester City-in Crystal Palace laka point khat chauh an hmuh hnuah Sheffield United lakah an talbuai. Spanish manager Pep-a'n bench-ah Aguero a dah a, Man City-in Sheffield United keeper Dean Henderson an paltlang thei lo.

Man United aṭanga loan hmanga hawh Henderson hian Raheem Sterling leh Nicolás Otamendi te goal khung tur ṭha zetin a dang a, minute 36-naah Gabriel Jesus-a penalty pet a dang leh bawk. Minute 67-naah Jesus aiah Aguero a lut a, minute ruk hnuah Argentine striker hian Kevin De Bruyne pass chu goal-ah a chantir.

Manchester City tana chanchin ṭha erawh Aymeric Laporte a inlan thei tawh a, French defender hian ni 143 hnuah inkhel bul a ṭan. Pep Guardiola chuan, "A awm loh hi kan tuar hle. A tlan chakna te, a ball tauh theihna te, tlarhnung aṭanga game siamtu a nih avang hian player ṭha bik a ni," tiin a fak hle.

Laporte awm loh chhungin midfielder pahnih Fernandinho leh Rodri te chu tlarhnungah pawhlet ṭhin an ni a, defender lai ṭha sa an tluk pha lo. Season liam taa Man City-in league nomawi an chawi khan Laporte hian match 38 aṭangin match 35-ah bul a ṭan a, tun season-ah erawh tun ṭum hi a vawi li inlanna chauh a ni.

Man City tlarhnung buaina a fel tawh dawn niin a lang a, penalty pettu ṭha erawh an la mamawh. Jesus hian league-a penalty a pet hnuhnung panga aṭangin vawi thum a hlah a, Guardiola-a'n kum 2016-a City a zawm hnuah league bikah penalty vawi 26 aṭangin vawi 19 chiah an khung.

Kum 49 mi Guardiola chuan, "Ederson a ṭha ber. Penalty pettu kan neih ṭha ber a ni. Hlauhthawnna nei loin a pet 

ṭhin," tiin fiamthu pahin a sawi.