Madrid Derby: Hmuhnawm, ngaihnawm leh ropui

Football khawvelin Spanish football lam a hawi ṭhup hun a awm ṭhin a, chu chu El Clasico leh Madrid derby-ah a ni. 

Zanin dar 12:30-ah tun season-a a vawi khat nan Madrid derby khelh a ni dawn a, Atletico Madrid khelmualah Real Madrid an lenglut dawn. 

Team pahnihin beisei anga season an ṭan ṭha lo chungin Barcelona leh team dang chet chhiat zarah table chunglam an la luah tho a, zanin inkhel tur hi La Liga table chung bera awm tur zawnna a ni ang. Real hian match ruk an khelh tawhah point 14 neiin table chung ber an luah mek a, point khata phak lotu Atletico Madrid chu pahnihnaah an awm. 

Real Madrid-in beisei angin season bul an ṭan lo a, league match hmasa pali aṭangin vawi hnih chiah an chak a, vawi hnih an khingpui an inhnehtawkpui. 

Champions League-ah an mualpho zui a, Paris Saint-Germain lakah 3-0 in an tlawm. Real boss Zinedine Zidane ban duhtu an pung a, Real an mualpho. Spanish media-ten Zidane chanchin ṭha lam ziah leh sawi tur an hre lo. 

PSG an hneh loh hlim khan Spanish football expert Guillem Balague chuan, "Match li emaw match nga lo awm tur hi Zidane hma hun hril tur a ni ang," tiin a lo sawi hial tawh. 

Mahse, pressure sang karah Zidane-a'n result ṭha a hlawh chhuak ve leh ṭan ta a, PSG hnuah Sevilla (1-0) leh Osasuna (2-0) hmachhawnin hnehna an chang ve ve. 

Hriat tel atana ṭha erawh Sevilla leh Osasuna hi Zidane theihna tak tak teh nan Real thuneitu lam ten an hmang duh kher lo mai thei a, Atletico nena an inkhel tur hi 'tehna' a ni ang. 

French manager tan tlawm a thiang lo tihna a ni a, hmelma kumhlun laka tlawm hi thuneitu sang lamin an hrethiam dawn lo. Hetihlai hian Zidane-a'n inkhelh hmain chanchin lawmawm leh lawmawm lo a neih pawlh. Hliam vanga an chawlh reng hnuah Isco leh Luka Modric-ten training an zawm leh tawh a, midfield-a an neihsa James Rodriguez, Casemiro, Toni Kroos leh Fede Valverde-te nena en chuan La Liga midfield en châkawm pawl an ni leh tawh. 

Thu lawmawm lo erawh left back Marcelo leh Ferland Mendy an inhliam ve ve a, centre back-a a hun tam zawk hmangtu Nacho chu vei lamah dah a nih a rinawm. 

Atletico Madrid-in an league match hmasa pathumah hnehna an chang a, Real leh Barca chet fuh loh lai a nih bawk avangin fans an hlim hle. 

Mahse, match linaah Real Sociedad (2-0) an ngam lo a,Champions League-ah Juventus (2-2) an inhnehtawkpui zui a, Celta Vigo (0-0) lakah an chak zo chuang lo. Mahse, Thawhlehni zan khan Atletico hi insiamṭhain Real Mallorca chu 2-0 in an hneh a, Madrid derby-ah mahni mual ngeia inkhel tur an nih avangin fan-ten chak an beisei ang. 

Coach Diego Simeone chuan, "Atletico fan-te hian chak loh an hrethiam lo a, result ṭha beiseia min sawisel a nih chuan demna ka nei lo," a ti a, zaninah chak a tum ang.

Atletico Madrid tan Alvaro Morata chu match hnuhnung bera a red card avangin a inlan theih a rinawm lo a, thu chiang erawh a la awm lo. 

Madrid khaw club hian Morata-a'n Real a hmachhawn nan red card chungchang hi ngaihtuah ṭha tura thlen an tum. Morata hi inlan thei lo pawh ni se Atletico fan-te tan lunghnur lutukna tur niin a lang lo. Mallorca laka tlarhmaa inkawp Joao Felix leh Diego Costa ten khel dun turin harsatna an tawk lo tih an pholang a, Real tan mangchhia thlen turin an ṭha tawk. 

Hriat tel atana ṭha erawh Real hian tlarhmaah Eden Hazard, James Rodriguez, Gareth Bale leh Karim Benzema an nei a, Atletico tan a awlsam lo ang.