FIFA Workshop-ah MFA aiawh tel

Ni hnih awh tur FIFA Capacity Building Workshop for State Associations (India) chu September 26 khan Radisson Blu hotel, Dwarka, New Delhi-ah neih ṭan a ni a, nimin tlai khan khar a ni.

He hunah hian FIFA leh All India Football Federation (AIFF) aiawhte bakah state football association thlan chhuah 10 aiawhte an tel a; Mizoram aṭangin MFA honorary secretary Lalnghinglova Hmar leh Samson Ramengmawia, development officer-te an tel.

Nimin khan Mizoram Football chungchangah Lalnghinglova Hmar chuan presentation a pe a, FIFA leh AIFF tih lohah MFA  hi tun workshop-a presentation pe tura sawm awm chhun an ni. Kal khawmte lawmna thusawitu AIFF General Secretary Kushal Das chuan hma chhawp hrang hrangte ṭha taka kalpui a ṭul tih sawiin state association-te chu ṭan la zual turin a fuih.

FIFA aiawha Asia leh Oceania enkawltu Sanjeevan C. Balasingam chuan India chu football-ah a ṭhang harh mek tih a sawi a, "India hmasawnna hi khawvel huap a nih theihna turin tan kan la zel ang," a ti. AIFF Technical Director thar, football coach lar Arsene Wenger leh Carlos Queroz-te nena lo thawkho tawh thin Isac Dory chuan India ram football hma chhawp hrang hrangte nimin chawhnu khan a sawi. 

FIFA Forward project hnuaiah AIFF in state football association hmasawnna turin hna a kalpui mek a, a tirah state thlan chhuah 11-ah he project hi a kalpui. He mi hnuaiah hian coach education, refeering education, player registration system, youth league, baby league, grassroots, women's football leh program hrang hrang a kalpui mek a ni.

FIFA aṭanga lo kal mi thiamten kal khawmte hi football hmasawnna kawng an zirtir bakah AIFF official lamin India ram football thlen chinte an sawifiah a, sawihona hun hman a ni bawk.