Klopp-a rinna vangin Gerrard a lawm

Liverpool captain hlui Steven Gerrard chuan Jurgen Klopp-a'n Anfield-a amah thlak tura a duh thu a sawi chu thu hriat nuam tak a nih thu a sawi a, chutihrual chuan Klopp chu Liverpool-ah a rei thei ang ber cham tura a duh thu a sawi zui. 

Klopp hian Reds fan-te atchilh rawn Gerrard chungchang sawiin, "Kenny Dalglish leh Stevie hi Liverpool ka zawm ni aṭang khan min pui bertu an ni a, ban lo tawk dawn ta ila chu Kenny hian min thlak mai thei. "Mahse, an tih hmasak ber tura ka ngaih chu Glasgow aṭanga Stevie hruaikir a ni ang. Min thlak tur chuan ani hi ka duh ber," a ti. 

Gerrard chuan chhangletin, "Mak ka tih rualin ka lawm em em bawk. Mahse, Klopp khan, 'Min ban chuan,' a ti a, Klopp hi ban a ni dawn lo. He hna hi chelh reng se ka duh. Liverpool fan ka ni a, Reds ṭantute zawng zawngin ka thusawi hi min pawmpui ang," a ti a, Klopp thusawi vangin lawm mah se a chhuah loh a duh zawk. 

Captain Fantastic hian Rangers manager a nih hmain Liverpool Under 19 a enkawl hman a, Scottish Premiership-a a season hmasa berah season hmasa khan Rangers chu pahnihna a nihpui. Kum 39 mi Gerrard hian June 2022 thleng Rangers-ah contract a nei a, Klopp hian 2022 thleng Anfield-ah contract a nei ve bawk. 

Klopp enkawlna hnuaiah Liverpool hian season hmasa khan Champions League nomawi an chawi a, tun season Premier League match rukah an la chak kim vek. Vawiin tlai dar 5:00 hian Sheffield United nen league match an khel ang.