SonyLIV-ah MPL Highlights

India rama internet television channel leh subscription video on demand service ṭhangduang leh hriat hlawh ber pawl SonyLIV leh Mizoram Premier League an thawkdun a, MPL highlights hi Sony Liv-ah hian en theiha chhawpchhuah ṭhin a ni. 

Sony Liv leh MPL inremna ang chuan Mizorama club football inelna sang bera inkhel ṭhenkhat hi Sony Liv chuan live-in a pe chhuak ṭhin a, a dang zawng hi highlights en theih tura dah a ni bawk. Phone aṭanga inkhel en duh tan Google Play Store-ah Sony Liv hi download theih a ni a, computer aṭangin www.sonyliv.com-ah en theih a ni bawk. 

Sony Liv leh MPL thawkdun hi tun thlengin phai lam media-te mak tih a la tling a, MPL en theih a nih tur thu tihchian a nih rual khan sawi a hlawh nghal hle - Sony Liv an lian miau a!

Sony Pictures Networks hnuaiah Sony Liv hi a awm a, Mumbai-a hmunpui nei SPN hrilhfiah dan awlsam ber chu Sony Six, Sony Ten 1, Sony Ten 2, Sony Ten 3 leh Sony ESPN neitute an ni a, infiamna pawn lamah channel an nei nual bawk. 

October 2013 khan Sony Liv hi din ve chauh a ni a, hetihlai hian India ramah digital media a la lar lutuk loh avangin sumdawng tan chuan 'risk' sang tak a nihna chen a awm. Kum 2015-ah Sony elpui ber Star India chuan ICC Cricket World Cup hisap chungin  Hotstar an rawn din a, a kum lehah Indian mi hausa ber Mukesh Ambani chuan khawvela mobile data network man tlawm ber Reliance Jio a rawn ti chhuak zui. 

Hei hian nasa takin video-streaming app a ti ṭhang a, tunah chuan hetiang app hi 40 vel awm tawhin kum 2023-ah chuan he sumdawnna hian dollar tluklehdingawn nga a hawlh phak rin a ni. 

July 2019 record-a a lan dan chuan Sony Liv hi mi maktaduai 100 ngawtin an download tawh a, tun hnai thla 15-18 chhung khan a ṭhang nasa lehzual. January 2018 khan Sony hian South Africa-a India cricket tour chu digital rights an chang a, hei hian an ṭhanna kawngah a pui hle.

App ho zirchiang ṭhintu 'App Annie' zirna aṭanga a lan dan chuan February khan Sony Liv hian thlatin entu maktaduai 7.7 vel an nei ṭhin a, March-a thlen meuh chuan entu an neih zat hi maktaduai 15.8-ah a kai sang!

Monthly active users (MAUs) tia an sawi 'thlatin entu zat' hi FIFA World Cup vang khan nasa takin a pung bawk a, nikum World Cup kha Sony Liv aṭangin mi maktaduai 70 velin an en - India-in football-a inkhel entu a ngah ber a ni. 

Thlatina Sony Liv entu zat hi tunah chuan mi maktaduai 70 aṭanga 80 inkar vel a ni tawh a, India rama OTT platform lar pahnihna hial a ni ta - kum 2020-ah chuan Sony hian MAU hi maktaduai 100 vel neih an tum. Belhchian dawl

Tun dinhmunah chuan Sony Liv hmangtute hian ni khatah minute 35-45 zel hmang anga chawhrual a ni a, minute tinin mi 100 zelin an download - he thu buatsaih a nih laia download tu awm tawh zat hi maktaduai 109 a tling. 

Sony hian advertisement chu sum hmuh nan bera an hman a ni a, an app hmangtu zinga 20-25% chu sum senga hmangtu an ni - movie 1,500 vel en tur a awm a, show hrang hrang lar tak tak en tur a awm bawk. 

Sony hian thla khat (Rs.99), kum chanve (Rs. 299) leh kum khat (Rs. 499) hmangin subscription plan an kalpui mek a, a tam zawk erawh a thlawna en theih a ni. UAE, Qatar, Kuwait, Oman, Saudi Arabia leh Bahrain-ah te inzar pharh turin Sony hian hma an la mek a, South Asia ram bakah New Zealand leh Australia an tin zawn mek bawk. 

Sony Liv hian khawvel huapa en hlawh La Liga, Serie A, Ligue 1, UEFA Champions League leh Europa League-te chu an app-ah hian en theih turin an pho chhuak ṭhin a, Indian football bikah chuan MPL hi an thawhpui hmasa ber a ni. 

India ramah Indian Super League leh I League a awm a, anni hi chu AIFF nena thawk dun Star TV lam chanpual an ni. National league ni lo zingah league hriat hlawh tak tak an awm. MPL bakah Calcutta Football League, Kerala Premier League, Goa Professional League leh Shillong Premier League-te chu India rama national niloa football league langsar zual an ni. 

Mahse, CFL meuh pawh hi national television platform-ah pekchhuah an la ni ngai lo a, MPL hi India ram huap channel-in live-a inkhel a pekchhuah hmasa ber a ni. 

News 18 chuan, "MPL hlawhtlinna hi midang tana entawn tur a ni," tiin MPL-in Sony Liv an thawhpui thei chu an fak. 

Sony Pictures Networks India Business head (Digital) Uday Sodhi chuan, "MPL kan thawhpui hian tualchhung player kan puihnaah kan ngai a, midang hmuh tura an talent phochhuahsak kan duh a ni. "Football vang hian entu kan ngah phah em em a, international league piahlamah tualchhung league ngainatute kan platform-ah kan pawh hnaih theih kan beisei bawk," a ti. 

MPL hian phai lam aṭang thlengin ngaihven a hlawh a, Sony Liv leh MPL thawhhona ti hlawhtling turin football ngainatu Mizo kan pawimawh tel.