Goodison Park tlawh tur Man City

Manchester City-in zanin dar 10:00 hian Goodison Park-ah Everton an hmachhawn dawn. Pep Guardiola hote hi Norwich City laka an mualpho hnuah a zawnin match thum an chak leh tawh avangin Premier League champion hian point thum an hmuh ngei a rinawm.

Man City-in match hnuhnung pathumah goal 14 ngawt an khung a, goal an chhuah lo. City goal khat hi own goal a ni a, goal 13 dang hi Bernardo Silva (3), Sergio Aguero (2), Gabriel Jesus (2), Riyad Mahrez (2), David Silva, Kevin de Bruyne, Raheem Sterling, Ilkay Gundogan leh Nicolas Otamendi te khung niin goal khungtu hming en hian an ṭhatzia a lang.

UCL-ah Shakhtar Donetsk chu khualmualah 3-0 in an hneh a, hetiang zat bawk hian Deepdale-ah Preston North End chu League Cup-ah an hneh. Premier League-a an match hnuhnung berah Watford chu 8-0 zetin Etihad Stadium-ah an sawp a, Pep-a hote hian hma an sawn zel.

Man City-in goal khung an harsat lo a, tute pawh lut se an khingpui tlarhnungte tan buaina tham an tling vek. A bik takin tun hnaiah De Bruyne a khel ṭha a, chance vawi 27 siam tawh Belgian midfielder ven hi mahni muala khel tur Everton hna hmasa a ni thei ang.

Man City-in Leroy Sane awm loh an tuar rih lo a, centre back pahnih Aymeric Laporte leh John Stones te awm loh avang erawhin insiksawi deuh an mamawh.

Preston an hmachhawn chu tlarhnung enchhin nan hmangin Eric Garcia (Kum 18) leh Taylor Harwood-Bellis (17) te inkawpin mual sirah Angelino (22) leh Cancelo (25) te an awm. An ṭhat dan nia lang zawk erawh Watford hmachhawn ṭuma an inrem dan defence laia Otamendi (31) leh Fernandinho (34) te inkawp a, wing back-a Kylie Walker (29) leh Benjamin Mendy (25) te dah kha a ni.

Match hnuhnung pahnihah player hran ṭhiauin bul an ṭan a, heta tel lo Oleksandr Zinchenko (22) a la awm bawk avangin inhliam vanga buaina hi Pep Guardiola-a'n awmze neia player remin a ching fel a tih theih.

Everton hian kum 2017 khan Man City hi Goodison Park-ah 4-0 in an hneh a, Etihad Stadium-ah 1-1 in an chelh leh bawk. Hemi hnu hian Toffees-in ṭum thum City hi hneh lo zawn mah se Pep Guardiola hote hian Goodison Park hi chet sual theihna a ni tih an hrechiang ang.

Chutihrualin Everton hian league-ah Bournemouth leh kaithar Sheffield United te an hneh lo zawn a, kai thar dang Aston Villa an hneh tawh loh bawk avangin manager Marco Silva hi ban theih dinhmun a ding mek. Pawisa thapna lamah chuan Silva hi ban tura rinkai ber a ni a, Man City hian goal an khung tam a nih phei chuan Portuguese manager hian a hna ngai hi a chelh rei tawh kher lo ang.