Last 16-ah Murray a tla

Andy Murray chuan singles match khel leh tawh mah se beisei angin a la ṭha tawk lo a, a khingpui Alex de Minaur hneh loin Zhuhai Championships last 16 aṭanga vuak tlak a ni.

China rama inelna neihah Murray hian Australian tlangval lakah set hmasa ber la. Mahse, world number 413 hi a khel ṭha chhunzawm thei lo, world number 31 lakah hian 4-6, 6-2, 6-4 in a chak lo.

Kum 32 mi Murray chuan, "Taksa a la fit tawk lo, kha tak kha ani chuan min beihna remchangah a rawn hmang ta a ni. A tir lamah khel pangngai viau mah ila a rei hnu khan ka nihna tak a rawn lang," tiin singles match hautak khelh chu a la harsat thu a sawi.

Britain tlangval hi January thla khan a vawi hnih nan a khel bawr zai a ni. A hliam dam hnuah doubles match chu a khel nual tawh, ATP Tour hnuaia singles bikah erawh tun inelna round hmasa lama Tennys Sandgren a hneh kha hnehna a chan lehna hmasa ber a ni chauh.

Seeded pasarihna De Minaur hian a match lehpekah chuan Borna Coric a hmachhawn leh ang, Minaur hian inkhel dangah tualchhung tlangval Wu Di chu 6-3, 6-3 in a lo hneh ve bawk.