Zanin dar 12:30-ah Man United Vs Arsenal

Manchester United-in zanin dar 12:30 hian Old Trafford-ah Arsenal an mikhual dawn. Tun hmaa Premier League tihmuhnawmtu club pahnih inhmachhawn hi tun hnaiah an result a ṭhat miau loh avangin a boruak a zuai ta deuh.

Ole Gunnar Solskjaer hote hian point riat hmuin table-ah 11-naah an awm mek a, Norwegian manager dinhmun a derthawng ṭan. Arsenal pawhin match ruk aṭanga point 11 chauh an hmuh avangin inchhuang thei an ni lo a, club pahnih tan season thara Europa League khelh loh pawh hi thil theih a ni.

Kum 2016 khan Manchester United-in tlarhma player inhliam ngah vangin Arsenal hmachhawn turin Europa League-a FC Midtjylland lama goal khung hlim Marcus Rashford an hmang.

Kum 18 leh ni 120 mi English striker hian Old Trafford-ah goal hnih a khung a, United-in Arsenal 3-1 in an hneh. Gunners hian hun ṭha an bawhpelh a, tuna an inhmachhawn hma match 12-ah United hi khualmualah hneh an nei lo.

Tun ṭumah hian United hian tlarhmaah harsatna an nei leh a, Anthony Martial leh Marcus Rashford te hliam vangin an chhawr theih a rinawm loh. Ole Gunnar Solskjaer-a'n Romelu Lukaku leh Alexis Sanchez te a chhuahtir bawk avangin Mason Greenwood chu mipui mit fukna tur a ni.

Greenwood hian September 19 khan Europa League-ah Astana lakah chakna goal khungin European competition-ah United record siamin kum 17 leh ni 353 mi hi  goal khung naupang ber a ni a. Ni ruk hnuah Greenwood bawk hian Rochdale lamah goal khungin League Cup-a United tana goal khung naupang pathumna niin Norman Whiteside leh Ryan Giggs te chiah a tluk lo.

October 1-a kum 18 tling tur Greenwood an fakna ber chu a ke pahnih a hmang thiam hi a ni a, chutihrualin Manchester United sulhnu en chuan Arsenal nena academy naupang rinrawl an ring hian champion kawng chu an zawh lo tih a chiang thung.

Manchester United midfielder Paul Pogba chu ngalrek hliam vangin a dinhmun a chiang lo a, left-back Luke Shaw pawhin training zawm tawhin khel thei dinhmunah a ding.

Arsenal pawhin chanchin ṭha neiin Rob Holding, Hector Bellerin leh Kieran Tierney te chhawr theih turin an awm vek a, tlarhnung phui sawt tura ngaih a ni. Chutihrualin Alexandre Lacazette inhliam erawh hriat nuam a ni lo ang.

Gunners boss Unai Emery chuan captain atan Granit Xhaka a ruat thar a, Swiss midfielder hian captain armband hreng fo mah se captain nghet a nih tak avangin mawhphurhna an neih belh ang. Emery chuan, "A khelhpuiten an ring a, keipawhin ka ring. Player ṭha tak, mi ṭha tak leh professional zet mai ni a, tihsual chang erawh a nei. A pawimawh ber erawh tihsual aṭanga inzir zel hi a ni," tiin captain thar chungchang a sawi.

Tlarhma lamah United an buai laiin Arsenal hian Pierre-Emerick Aubameyang an kawl a, Gabon striker hian league match hnuhnung 13 aṭangin goal 13 a khung. Chutihrualin Auba hian Premier League top six-a an chhiar club-te khualmuala an hmachhawn ṭumin match hnuhnung pariatah goal a khung loh bakah assist a nei lo a, Old Trafford-a an lengluh hunah a record duhawm loh tak hi siamṭhat a tum dawn a ni.