Goal nen Ronaldo a lo kir

Hliam tenau vanga match khat a khelh theih loh hnuah Cristiano Ronaldo a lo kir leh tawh a, Portuguese forward hian goal khung chhunzawm leh nghalin Juventus chu SPAL lakah 2-0 in hnehna a chanpui.

Inrinni zan Serie A inkhelah champion lai Juve hian chawlhlawk hma chiaha midfielder Miralem Pjanic ball pet kum mawi tak hmangin hma an hruai a, second half-ah Ronaldo-a'n goal hnihna leh season kal laia a league goal thumna ni bawk a khung.

Maurizio Sarri-a'n tlarhmaah Ronaldo leh Paulo Dybala te a inkawptir a, an hnungah Aaron Ramsey dah a ni. Arsenal midfielder hlui hian goal khung theihna hun ṭha nei mah se SPAL keeper Etrit Berisha a paltlang zo lo. Sami Khedira pawhin a hun ṭha neih a chhawr ṭangkai thei bik lo.

Italian manager Sarri-a'n goalkeeper Gianluigi Buffon tan khelhna hun a siamsak leh a, kum 41 mi hian fottball a khelh hun chhungin match 903 a khel tling ta chiah a, Italian player zinga match nei hnem ber AC Milan legend Paolo Maldini (902 match) chu a khum ta chiah.

Juve manager Sarri chuan, "Second half-ah kan khel ṭha zawk a, goal chhuah loa hnehna kan chang thei kha a lawmawm hle. Match khelh tur kan ngah avangin player kan siksawi nasat a ngai, chutiang chung pawh chuan a lut apiangin ṭha takin an hna an hlen chhuak," a ti.

Italian champion hian Thawhlehni zanah Champions League khel turin German club Bayer Leverkusen an mikhual dawn a, chumi hnu an league match hmasa atan October 7 hian Inter Milan nen an inkhel zui leh ang.